IPL: அவர கேப்டன் பதவியிலிருந்து தூக்குங்க; எப்பயாவது தான் ரன் எடுக்குறாரு - இந்திய வீரர் அதிரடி!
Jiyath
in கிரிக்கெட்
ராஜஸ்தான் ராயல்ஸ் கேப்டன் பொறுப்பிலிருந்து சஞ்சு சாம்சனை நீக்க வேண்டும் என்று முன்னாள் வீரர் ஸ்ரீசாந்த் தெரிவித்துள்ளார்.
சஞ்சு சாம்சன்
ஐபிஎல் கிரிக்கெட் தொடரில் ராஜஸ்தான் ராயல்ஸ் அணியின் கேப்டனாக 'சஞ்சு சாம்சன்' இருந்து வருகிறார். இவரின் தலைமையிலான ராஜஸ்தான் அணி கடந்த ஆண்டு நடைபெற்ற ஐபிஎல் தொடரில் இறுதிப்போட்டிக்கு முன்னேறியது.
மேலும், வரும் 2024ம் ஆண்டு நடைபெறவுள்ள ஐபிஎல் தொடரிலும் சஞ்சு சாம்சன், அந்த அணியின் கேப்டனாக தொடர்வார் என்று எதிர்பார்க்கப்படுகிறது. இந்நிலையில் இந்திய கிரிக்கெட் அணியின் முன்னாள் வீரர் ஸ்ரீசாந்த், ராஜஸ்தான் ராயல்ஸ் கேப்டன் பொறுப்பிலிருந்து சஞ்சு சாம்சனை நீக்க வேண்டும் என்று தெரிவித்துள்ளார்.
இது தொடர்பாக அவர் கூறியதாவது "என்னைப் பொறுத்தவரை ராஜஸ்தான் ராயல்ஸ் அணி, அவர்கள் அமைப்பை மாற்ற வேண்டும். நான் அந்த அணிக்காக விளையாடியபோது, அவர்கள் ஒரு முழுமையான அமைப்பை கொண்டிருந்தனர்.
ஸ்ரீசாந்த் கருத்து
டிராவிட் பாய் அவர்களது கேப்டனாக இருந்தார். அவர் நல்ல தொலைநோக்கையும் வியூகத்தையும் கொண்டவராகவும் இருந்தார். நான் விளையாடிய கேப்டன்களில் அவர் மிகச் சிறந்தவர். சஞ்சு கேப்டனாக இருப்பதில் அவர் அதனுடைய தீவிரத்தை முழுமையாக எடுத்துக்கொள்ள வேண்டும்.
அல்லது பட்லரை கேப்டனாக நியமிக்க வேண்டும். குறைந்தபட்சம் பட்லர் ஒரு உலகக் கோப்பையை வென்றிருக்கிறார். அவரால் சிறப்பாக செயல்பட முடியும். ஒரு கேப்டனாக உங்களுக்கு போட்டியை வெல்லும் ஒரு வீரர் தேவை.
ஒவ்வொரு போட்டியிலும் இல்லை என்றாலும் கூட பெரிய தொடர் என்பதால் 3 முதல் 4 போட்டிகளுக்கு தேவை. ஆனால் ஒரு தொடரில் ஒரு முறை மட்டும் விளையாட கூடிய வரை நம்ப முடியாது. சஞ்சு சாம்சன் எப்போதாவது தான் ரன் எடுக்கிறார்" என்று தெரிவித்துள்ளார்.
