தூத்துக்குடியில் 144 தடை - மாவட்ட ஆட்சியர் உத்தரவு!

தூத்துக்குடி மாவட்டத்தில் தற்காலிகமான 144 தடை உத்தரவு போடப்பட்டுள்ளது.

மாவட்ட ஆட்சியர்

தூத்துக்குடி மாவட்டம், பாஞ்சாலக்குறிச்சியில் வீரசக்கதேவி திருவிழாவை முன்னிட்டு இன்று முதல் மே 14 -ம் தேதி காலை 6 மணிவரை மாவட்டம் முழுவதும் 144 தடை உத்தரவு பிறக்கப்பட்டுள்ளது.

இது குறித்து, மாவட்ட ஆட்சியர் செந்தில்ராஜ் வெளியிட்டுள்ள அறிக்கையில், “பாஞ்சாலங்குறிச்சியில் இன்று மே-12 மற்றும் 13-ம் தேதிகளில் வீரசக்க தேவி ஆலய திருவிழா நடக்கிறது.

இந்த திருவிழாவை முன்னிட்டு, 14-ம் தேதி காலை 6 மணிவரை மாவட்டம் முழுவதும் 144-ன் கீழ் தடை உத்தரவு பிறப்பிக்கப்படுகிறது.

ஆலயத் திருவிழாவை முன்னிட்டு அசம்பாவிதங்கள் ஏதுமின்றி அமைதியாக நடக்கும்பொருட்டும், சட்டம் ஒழுங்கினை பராமரிக்கவும் இந்த உத்தரவு பிறப்பிக்கப்படுகிறது" என்று கூறியுள்ளார்.

தடை உத்தரவு

தொடர்ந்து மாவட்ட ஆட்சியர், "இதன்படி 5 அல்லது அதற்கு மேற்பட்ட நபர்கள் கூடுவதற்கும், தூத்துக்குடி மாவட்டத்தின் பல்வேறு பகுதிகளில் இருந்தும், பிற பகுதிகளில் இருந்தும் வந்து விழாவில் கலந்துகொள்ளும் பொதுமக்கள் வாள், சுத்தி, கம்பு போன்ற அபாயகரமான ஆயுதங்களை ஊர்வலமாகக் கொண்டுவருவதற்கும் தடை விதிக்கப்பட்டுள்ளது.

மேலும், தூத்துக்குடி மாவட்டத்தில் இருந்தும், வெளிமாவட்டத்தில் இருந்தும் அனைத்துவகை வாடகை வாகனங்கள் மூலமாக திருவிழாவிற்கு மக்களை அழைத்துவரவும் தடைவிதிக்கப்பட்டுள்ளது.

பள்ளி, கல்லூரி வாகனங்கள், அன்றாட அத்தியாவசிய பொருட்களை கொண்டுசெல்லும் வாகனங்கள் , சுற்றுலா வாகனங்கள், சரக்கு வாகனங்கள், ஆம்னி பேருந்துகள் ஆகியவற்றுக்கு இதில் இருந்து விலக்கு அளிக்கப்படுகிறது.

இந்த நாட்களில் கூட்டங்கள், அன்னதானம், ஊர்வலங்கள் நடத்த இருப்போர் , தூத்துக்குடி எஸ்.பியை அணுகி முன் அனுமதி பெற்று இருக்க வேண்டும்.

மேலும் இந்த தடை உத்தரவு திருமணம் மற்றும் இறுதிச்சடங்கு ஊர்வலங்களுக்குப் பொருந்தாது” என்று தெரிவித்துள்ளார்.