இவ்வாறு ஆளுநர் நடப்பது தவறு.. அவரை திரும்ப பெறுவதே ஒரே தீர்வு - அமைச்சர் ரகுபதி!!
சட்டப்பேரவையில் நிறைவேற்றப்பட்ட மசோதாக்களுக்கு ஒப்புதல் தராமல் இழுத்தடிப்பதற்காகவே ஆளுநர் முயற்சிக்கிறார் என சட்டத்துறை அமைச்சர் ரகுபதி குற்றம்சாட்டியுள்ளார்.
அரசு - ஆளுநர் விவகாரம்
தொடர்ந்து தமிழக அரசிற்கும் ஆளுநர் ஆர்.என்.ரவிக்கும் முரணான போக்கு நீடித்து வருகின்றது. சட்டமன்றத்தில் நிறைவேற்றப்படும் மசோதாக்களுக்கு ஆளுநர் ரவி காலம் தாழ்த்துகிறார் என்ற குற்றசாட்டை தொடர்ந்து முன்வைத்து வருகின்றது தமிழக ஆளும் திமுக அரசு.
இந்நிலையில், இந்த விவகாரம் குறித்து கருத்து தெரிவித்துள்ள தமிழக சட்டத்துறை அமைச்சர் ரகுபதி, தமிழக சட்டமன்றத்தில் நிறைவேற்றப்பட்ட 10 மசோதாக்களை ஆளுநர் ஜனாதிபதிக்கு அனுப்பிவிட்டார் என்று தகவல் அளித்தார்.
ஆளுநர் ரவி சட்டமன்றத்தில் 2-வது முறையாக நிறைவேற்றப்பட்டு அவரின் ஒப்புதலுக்காக அனுப்பிய மசோதாக்களுக்கு ஒப்புதல் தர ஆளுநர் ரவி மறுத்து வருவதாக குற்றம்சாட்டிய அவர், 2-வது முறையாக அனுப்பிய மசோதாக்களுக்கு ஆளுநர் ஒப்புதல் தர வேண்டும் என்றார்.
2-வது முறையாக அனுப்பிய மசோதாக்களுக்கு ஒப்புதல் தராமல் ஜனாதிபதிக்கு ஆளுநர் அனுப்பியுள்ளது தவறு என சுட்டிக்காட்டிய அமைச்சர் ரகுபதி, தமிழ்நாடு ஆளுநர் ஆர்.என்.ரவியால் நிர்வாகம் முடக்கியிருப்பதாகவும்,இதற்கெல்லாம் ஒரே தீர்வு தமிழ்நாடு ஆளுநர் ரவியை திரும்பப் பெறுவதுதான் என்றும் அதிரடியாக கருத்து தெரிவித்துள்ளார்.
