பாஜக இல்லாத கூட்டணி கட்சிகளை வரவேற்கிறோம்..! ஜெயக்குமார் அதிரடி
கூட்டணிக்கு பெரிய கட்சிகள் பல பேசிக் கொண்டிருக்கின்றன என அதிமுகவின் முன்னாள் அமைச்சர் ஜெயக்குமார் தெரிவித்துள்ளார்.
அதிமுக - தேர்தல்
அதிமுக தேசிய ஜனநாயக கூட்டணியில் இருந்து வெளியே வந்த நிலையில், தற்போது புது கூட்டணியை அமைக்கும் முயற்சியில் தீவிரமாக இறங்கியுள்ளது.
பாமக, தேமுதிக போன்ற கட்சிகள் தான் அதிமுகவின் முக்கிய டார்கெட்டாக இருக்கும் என கூறப்படும் நிலையில், இது வரை அதிமுகவின் சார்பில் இருந்து வெளிப்படையாக அக்கட்சிகளுக்கு அழைப்பு விடுக்கப்படவில்லை.
பாஜக அல்லாத
முன்னதாக மீண்டும் அதிமுகவின் கூட்டணிக்கு பாஜக முயற்சிப்பதாகவும், அதற்காக தான் ஜி.கே.வாசன் அண்மையில் எடப்பாடி பழனிசாமியை சந்தித்து பேசினார் என்றெல்லாம் கருத்துக்கள் வெளிவந்தன.
இன்று செய்தியாளர்களை சந்தித்த அதிமுகவின் முன்னாள் அமைச்சர் ஜெயக்குமார் பேசும் போது, நாடாளுமன்றத் தேர்தல் கூட்டணிக்கு பாஜக இல்லாத கட்சிகளை வரவேற்கிறோம் என்று குறிப்பிட்டு, கூட்டணிக்கு பெரிய கட்சிகள் பல பேசிக் கொண்டிருக்கின்றன என்றும் தெரிவித்தார்.
சென்னை ராயப்பேட்டையில் உள்ள அ.தி.மு.க தலைமை அலுவலகத்தில் தேர்தல் அறிக்கை தயாரிக்கும் குழுவின் 2வது ஆலோசனை கூட்டத்தில் கலந்து கொண்ட பின் இந்தப் கருத்துக்களை அவர் தெரிவித்தார்.