காற்றோடு கலந்தது ஆதி குணசேகரனின் குரல் - மாரிமுத்துவின் உடல் தகனம்!

மறைந்த நடிகர் மாரிமுத்துவின் உடல் அவரது சொந்த ஊரில் தகனம் செய்யப்பட்டது.

மறைந்த மாரிமுத்து

சின்னத்திரையில் அனைவரையும் கவர்ந்து விறுவிறுப்பாக சென்றுகொண்டிருக்கும் சீரியல் என்றால் அது எதிர்நீச்சல் தான். பெரியத்திரை அளவுக்கு அதில் நடிக்கும் நடிகர்கள் ஆக்டிங்கில் பயங்கரம்.

அந்த வகையில், ஆதி குணசேகரனாக நடித்த மாரிமுத்துவின் நடிப்புக்கென தனி ரசிகர் பட்டாளமே உள்ளது. இவருக்கு பாக்கியலட்சுமி என்ற மனைவியும் அகிலன் என்ற மகனும் ஐஸ்வர்யா என்ற மகளும் உள்ளனர்.

உடல் தகனம்

இந்நிலையில், டிரெண்டிங் ஸ்டாராக இருந்து வந்தவர் டப்பிங் பணியில் இருந்தபோது ஏற்பட்ட அசெளகரியத்தால் தானே கார் ஓட்டி மருத்துவமனைக்குச் சென்றுள்ளார். ஆனால், மாரடைப்பால் அங்கு சிகிச்சை பலனின்றி உயிரிழந்தார்.

இவரது மறைவு ஒட்டுமொத்த திரையுலகையும் அதிர்ச்சியடைய வைத்துள்ளது. தொடர்ந்து, சொந்த ஊரான தேனி அருகே உள்ள பசுமலைதேரி கிராமத்திற்கு நேற்று இரவு அவரது உடல் கொண்டு வரப்பட்டது.

ஊர் பொது மக்கள், உறவினர்கள் மற்றும் குடும்பத்தினர் உள்ளிட்டோர் இறுதி அஞ்சலி செலுத்தினர். தற்போது, அவரின் உடல் மயானத்தில் தகனம் செய்யப்பட்டது.