இன்று ஜெயலலிதா நினைவிட திறப்பு விழா: போக்குவரத்தில் மாற்றம்

முன்னாள் முதல்வர் ஜெயலலிதா நினைவிட திறப்பு விழாவை ஒட்டி, காமராஜர் சாலையில், இன்று காலை, 6:00 மணியில் இருந்து, நிகழ்ச்சி முடியும் வரை போக்குவரத்து மாற்றம் செய்யப்பட்டுள்ளது. சென்னை போக்குவரத்து போலீசார் வெளியிட்ட செய்திக்குறிப்பு, காமராஜர் சாலையில், போர் நினைவு சின்னத்தில் இருந்து, கண்ணகி சிலை வரை காலை, 6.00 மணி முதல் நிகழ்ச்சி முடியும் வரை, வாகனங்களுக்கு அனுமதி இல்லை.

அடையாறில் இருந்து பாரிமுனை நோக்கி செல்லும் சரக்கு மற்றும் வணிக வாகனங்கள், கிரின்வேஸ் சாலை சந்திப்பிலிருந்து, ஒயிட்ஸ் சாலை, ஸ்மித் சாலை, அண்ணா சாலை வழியாக செல்லலாம். அடையாறில் இருந்து காமராஜர் சாலையில் பாரிமுனை நோக்கி செல்லும், பஸ் உள்ளிட்ட வாகனங்கள், லஸ் சந்திப்பு, ராயப்பேட்டை நெடுஞ்சாலை, அண்ணா சாலை வழியாக செல்ல அனுமதிக்கப்படும்.

டாக்டர் ராதாகிருஷ்ணன் சாலையில், காந்தி சிலை நோக்கி செல்லும் தடம் எண், 27டி பஸ், ராமகிருஷ்ணா மடம் சாலை, மந்தைவெளி சந்திப்பு, தெற்கு கெனால் பேங்க் ரோடு, சீனிவாசபுரம் வழியாக பட்டினப்பாக்கம் செல்லலாம். மயிலாப்பூர் சந்திப்பிலிருந்து, சிவசாமி சாலை வழியாக காந்தி சிலை நோக்கி செல்லும் தடம் எண், 21-G பஸ், ராயப்பேட்டைநெடுஞ்சாலை, அண்ணாசாலை வழியாக பாரிமுனைக்கு செல்ல வேண்டும்.

மயிலாப்பூர் சந்திப்பிலிருந்து, சிவசாமி சாலை வழியாக அண்ணா சதுக்கம் நோக்கி செல்லும், தடம் எண், 45-B மற்றும் 12-G ஆகிய பஸ்கள், ராயப்பேட்டை மணிக்கூண்டு, ஒயிட்ஸ் சாலை, ஸ்மித் சாலை, அண்ணா சாலை சென்று ராஜா அண்ணாமலை மன்றத்தில் நிறுத்தப்படும். டாக்டர் ராதாகிருஷ்ணன் சாலையில், காந்தி சிலை நோக்கி செல்லும் அனைத்து வாகனங்களும், நடேசன் சாலை சந்திப்பிலிருந்து, காரணீஸ்வர் கோவில் சந்திப்பு வழியாக திருப்பிவிடப்படும்.

வாலாஜா சாலை மற்றும் பெல்ஸ் ரோடு சந்திப்பில், உழைப்பாளர் சிலை நோக்கி வரும் வாகனங்கள் அனைத்தும், திருவல்லிக்கேணி நெடுஞ்சாலை வழியாக விடப்படும். அண்ணா சதுக்கம் அருகில் உள்ள பஸ் நிறுத்தம், தற்காலிகமாக ராஜா அண்ணாமலை மன்றம் அருகில் மாற்றப்படும். பாரிமுனையிலிருந்து, ராஜாஜி சாலை மற்றும் காமராஜர் சாலை வழியாக, அடையாறு நோக்கி செல்லும் அனைத்து வாகனங்களும், ரிசர்வ் வங்கி சுரங்கபாதையில் திருப்பி விடப்பட்டு, ராஜா அண்ணாமலை மன்றம் வழியாக, வாலாஜா பாயின்ட், அண்ணா சாலை, அண்ணா சிலை, ஜெனரல் பேட்டர்ஸ் ரோடு வழியாக அடையாறு செல்லலாம்.இவ்வாறு, அதில் கூறப்பட்டுள்ளது.