அழியாத மை.. புரியாத புதிர் - 8 ஆண்டுகள் ஓட்டு போட முடியாமல் தவிக்கும் மூதாட்டி!
மை அழியாததால் மூதாட்டி ஒருவர் வாக்களிக்க முடியாத சம்பவம் அதிர்ச்சியை ஏற்படுத்தியுள்ளது.
அழியாத மை
கேரள மாநிலம் சொர்னூர் குளப்புள்ளியை சேர்ந்தவர் உஷா (62). இவர் கடைசியாக 2016-ம் ஆண்டு கேரள சட்டமன்ற தேர்தலின் போது வாக்களித்துள்ளார். அப்போது அவரது ஆள்காட்டி விரலில் மை வைக்கப்பட்டுள்ளது.
இந்த மை 8 ஆண்டுகளாக மறையாமலேயே இருந்து வருகிறது. அவர் சோப்பு உள்ளிட்ட பல பொருட்களைப் பயன்படுத்தி மையை அழிக்க முயற்சி செய்துள்ளார். ஆனாலும் மை அழியவில்லை.
ஏமாற்றம்
இதனால் 2019-ம் ஆண்டு மக்களவை தேர்தல் மற்றும் 2021-ம் ஆண்டு சட்டமன்ற தேர்தலிலும் உஷா வாக்களிக்கவில்லை. இதனால் பிரச்சனை ஏதும் ஏற்படுமோ என்று கருதி அவர் வாக்களிக்கவில்லை. தேர்தல் ஆணையமும் அவரை வாக்களிக்க வைக்க நடவடிக்கை ஏதும் எடுக்கவில்லை.
இந்நிலையில் நேற்று கேரளாவில் நடைபெற்ற மக்களவை தேர்தலிலும் உஷா வாக்களிக்க செல்லவில்லை. இதுகுறித்து அவர் கூறுகையில் "ஓட்டு போட முடியாததால் நான் தொடர்ந்து ஏமாற்றம் அடைகிறேன்" என்று தெரிவித்துள்ளார்.
