அதிவேகத்தில் வந்த லாரி.. வேன் மீது மோதி பயங்கர விபத்து - 7 பெண்கள் பலி!

வேன் மீது லாரி மோதியதில் 7 பெண்கள் சம்பவ இடத்திலேயே பலியாகியுள்ளனர்.

விபத்து

வேலூர் மாவட்டம், பேரணாம்பட்டைச் சேர்ந்த சிலர் இரண்டு வேன்களில் சுற்றுலா சென்றுவிட்டு, நேற்று தங்கள் சொந்த ஊருக்கு திரும்பியுள்ளனர். நாட்றம்பள்ளி அருகே உள்ள சண்டியூர் அருகே வந்து கொண்டிருந்த போது ஒரு வேன் பழுது அடைந்துள்ளது.

அதனால் சாலையோரம் நிறுத்தி வைத்து விட்டு பழுது நீக்கும் பணியில் ஈடுபட்டிருந்தனர். அப்பொழுது சாலையில் அதிவேகமாக வந்த லாரி ஒன்று பயங்கரமாக வேனின் பின்புறத்தில் மோதியது. அதனால் வேன் அப்பளம் போல் நொறுங்கியது.

உயிரிழப்பு

இந்நிலையில், வேன் பழுதுபார்ப்பதால் சாலையோரம் நின்றுகொண்டிருந்த பெண்கள் 7 பேர் சம்பவ இடத்திலேயே உயிரிழந்தனர். அத்துடன் 10 பேர் பத்திரமாக மீட்கப்பட்டுள்ளனர். மீட்கப்பட்டவர்கள் அரசு மருத்துவமனைகளில் சிகிச்சைக்காக அனுமதிக்கப்பட்டுள்ளனர்.

இது குறித்து போலீசார் வழக்கு பதிவு செய்து விசாரணை நடத்தி வருகின்றனர். இந்த சம்பவம் பெரும் அதிர்ச்சியை ஏற்படுத்தியுள்ளது.