4 கோடி வழக்கு - நெல்லை பாஜக வேட்பாளர் நயினார் நாகேந்திரனுக்கு சம்மன்
4 கோடி சிக்கிய வழக்கில் நெல்லை வேட்பாளர் நயினார் நாகேந்திரன் நேரில் ஆஜராக சம்மன் வழங்கப்பட்டுள்ளது.
4 கோடி
தேர்தல் விதிமுறை அமலில் இருந்த போது சென்னை எழும்பூரில் புறப்பட்ட நெல்லை எக்ஸ்பிரஸ் ரெயிலில் ரூ.4 கோடி பணம் தேர்தல் பறக்கும் படையினரால் பறிமுதல் செய்யப்பட்டது.
மேலும், அதுதொடர்பாக மூவர் கைது செய்யப்பட்டனர். கைது செய்யப்பட்டவர்களிடம் விசாரணை நடத்தியதில், நெல்லை பாஜக வேட்பாளர் நயினார் நாகேந்திரனுக்காக பணத்தை கொண்டுசென்றதாக வாக்குமூலம் அளித்தனர்.
அதன் அடிப்படையில், நயினார் நாகேந்திரனுக்குச் சொந்தமான ஹோட்டல் உள்ளிட்ட இடங்களில் தேர்தல் பறக்கும் படையினர் சோதனை நடத்தினர். வழக்கு விசாரணையை சிபிசிஐடிக்கு மாற்றி தமிழக சட்டம் - ஒழுங்கு டிஜிபி சங்கர் ஜிவால் உத்தரவிட்டார்.
நாயினாருக்கு சம்மன்
இது தொடர்பான ஆவணங்கள் சிபிசிஐடி போலீஸாரிடம் ஒப்படைக்கப்பட்டன. இந்நிலையில் இவ்வழக்கு தொடர்பாக நயினார் நாகேந்திரன், தமிழ்நாடு பாஜக அமைப்பு பொதுச்செயலாளர் கேசவிநாயகம், தொழில் பிரிவு தலைவர் கோவர்தன் , நயினார் நாகேந்திரனின் உதவியாளர் மணிகண்டன் ஆகியோருக்கு சிபிசிஐடி போலீசார் சம்மன் அனுப்பியுள்ளனர்.
இது தொடர்பாக நயினார் நாகேந்திரன் உட்பட பாஜக நிர்வாகிகள் நாளை மறுநாள் (31 மே 2024 ) நேரில் ஆஜராக வேண்டும் என்று அதில் தெரிவிக்கப்பட்டுள்ளது.
