முதல்வர் ஸ்டாலினைச் சந்தித்த நடிகர் விஜய் சேதுபதி - நிவாரண நிதிக்கு ரூ.25 லட்சம் வழங்கினார்

தமிழ்நாட்டில் கொரோனா பரவலைக் கட்டுப்படுத்த தளர்வுகளுடன் கூடிய முழு ஊரடங்கு அமலில் இருந்து வருகிறது. 

தற்போது பாதிப்புகள் பெருமளவு குறைந்துள்ளதால் சில தளர்வுகள் அளிக்கப்பட்டுள்ளன. கொரோனா பரவலைத் தடுக்க அரசு பல்வேறு நடவடிக்கைகளை மேற்கொண்டு வருகிறது.

கொரோனா தொற்று பரவல் தடுப்பு மற்றும் சிகிச்சைக்கு அதிக நிதி தேவைப்படுவதால் நன்கொடை வழங்குமாறு  முதல்வர் மு.க.ஸ்டாலின் கோரிக்கை விடுத்திருந்தார்.

இதனைத் தொடர்ந்து பலரும் முதல்வரின் நிவாரண நிதிக்கு நன்கொடை வழங்கி வருகின்றனர். அந்த வகையில் நடிகர் விஜய்சேதுபதி, தலைமைச் செயலகத்தில் முதல்வர் மு.க.ஸ்டாலினை சந்தித்து, கொரோனா நிவாரண நிதியாக 25 லட்சம் ரூபாய் வழங்கினார்.