மாணவர்களுடன் உணவு அருந்தி, காலை உணவு திட்டத்தை துவக்கி வைத்தார் அமைச்சர் உதயநிதி ஸ்டாலின்!

அமைச்சர் உதயநிதி ஸ்டாலின் காலை உணவு திட்டத்தை தொடங்கி வைத்தார்.

காலை உணவு திட்டம்

தமிழ்நாடு முழுவதும் அரசு பள்ளிகளில் 1-ம் வகுப்பு முதல் 5-ம் வகுப்பு வரை பயிலும் மாணவர்களுக்கு முதல்-அமைச்சரின் காலை உணவுத்திட்டம் கடந்த ஆண்டு செப்டம்பர் மாதம் 15-ம் தேதி தொடங்கி வைக்கப்பட்டது. இந்த திட்டம் நேற்று விரிவுபடுத்தப்பட்டது, அதில் முதல்-அமைச்சர் மு.க.ஸ்டாலின் நேற்று நாகப்பட்டினம் மாவட்டம் திருக்குவளை, ஊராட்சி ஒன்றிய நடுநிலைப்பள்ளியில் இதனை தொடங்கி வைத்தார்.

பின்னர், சென்னை மாநகராட்சியில் திருவல்லிக்கேணி நெடுஞ்சாலையில் உள்ள சென்னை நடுநிலைப்பள்ளியில் இளைஞர் நலன் மற்றும் விளையாட்டு மேம்பாட்டுத்துறை அமைச்சர் உதயநிதி ஸ்டாலின் மாணவர்களுக்கு காலை உணவினை வழங்கி திட்டத்தை தொடங்கி வைத்தார்.

அமைச்சர் உதயநிதி ஸ்டாலின்

இந்நிலையில், அமைச்சர் உதயநிதி மாணவர்களுடன் அமர்ந்து உணவு அருந்தினார். அப்பொழுது அவர் மாணவர்களுடன் உரையாடினார், பின்னர் மாணவர்களுக்கு லட்டுகளையும் வழங்கினார். அதன்பிறகு அவர் நிபுணர்களிடம் பேசினார், "நான் தமிழ்நாட்டின் எந்த மாவட்டத்துக்கு ஆய்வுப்பணிக்கு சென்றாலும் காலை உணவு திட்டம் குறித்து ஆய்வு செய்வதே எனது முதல் பணியாக இருக்கும்.

உணவின் தரம், மாணவர்கள் சாப்பிடுகிறார்களா?, வருகை பதிவேடு ஆகியவற்றை ஆய்வு செய்த பின்னரே அடுத்தகட்ட பணியில் ஈடுபடுவேன். காலை உணவுத்திட்டம் அறிமுகப்படுத்தப்பட்ட பள்ளிகளில் 30 சதவீதம் முதல் 40 சதவீதம் வரை மாணவர்களின் வருகை அதிகரித்துள்ளது.

தமிழ்நாட்டில் உள்ள 31 ஆயிரம் பள்ளிகளில் 1-ம் வகுப்பு முதல் 5-ம் வகுப்பு வரை படிக்கும் 18 லட்சத்து 50 ஆயிரம் மாணவர்கள் இதன் மூலம் பயனடைவார்கள்" என்று கூறியுள்ளார்.