மாணவர்களின் சாதி விவரங்களை ஆன்லைனில் பதிவு செய்ய உத்தரவு- பள்ளிக் கல்வித்துறை

தமிழகத்தில் உள்ள அனைத்து பள்ளி மாணவர்களின் சாதிச் சான்றிதழ் விவரங்களை EMIS இணையதளத்தில் பதிவு செய்ய பள்ளிக் கல்வித்துறை உத்தரவிட்டுள்ளது.

பள்ளிக் கல்வித்துறையின் உத்தரவு

அரசு, அரசு உதவிபெறும் மற்றும் தனியார் பள்ளிகளில் படிக்கும் அனைத்து மாணவர்களின் சாதி மற்றும் சமூகப் பிரிவு விவரங்களும் பதிவு செய்யப்பட வேண்டும்.

மாணவர்கள் பள்ளியில் சேரும்போது வழங்கிய சாதிச் சான்றிதழை வைத்து இந்த விவரங்களைப் பதிவு செய்ய வேண்டும்.  

ஏதேனும் தவறு இருந்தால் அதை உடனடியாகத் திருத்த வேண்டும் என்று அறிவுறுத்தப்பட்டுள்ளது.

மாணவர்களுக்கு வழங்கப்படும் கல்வி உதவித்தொகை, இலவச மிதிவண்டி, மடிக்கணினி உள்ளிட்ட அரசு நலத்திட்டங்கள் தகுதியானவர்களுக்கு கிடைப்பதை உறுதி செய்வதற்காக இந்த நடவடிக்கை எடுக்கப்பட்டுள்ளது.

மேலும், இவ்வாறு டிஜிட்டல் முறையில் பதிவு செய்வதன் மூலம், எதிர்காலத்தில் உயர்கல்விக்கு விண்ணப்பிக்கும் போது ஏற்படும் தாமதங்களைத் தவிர்க்க முடியும் என தெரிவிக்கப்பட்டுள்ளது.

மாணவர்களின் ஸ்மார்ட் அடையாள அட்டைகளில் சாதி விவரங்கள் இடம்பெறாது என்றும், இந்த விவரங்கள் கல்வித்துறையின் உள்நிர்வாகம் மற்றும் அரசு நலத்திட்டங்களுக்காக மட்டுமே பயன்படுத்தப்படும் என்றும் தெரிவிக்கப்பட்டுள்ளது.