பள்ளிகள் மீண்டும் ஜுன் 13ல் திறப்பு - அமைச்சர் அதிரடி அறிவிப்பு

அடுத்த கல்வியாண்டுக்கான (2022-23) வகுப்புகள் ஜூன் மாதம் 13-ந்தேதி தொடங்கும் என்று பள்ளி கல்வித்துறை அமைச்சர் அன்பில் மகேஷ் பொய்யாமொழி தெரிவித்துள்ளார்.

நடப்பு ஆண்டில் கொரோனா தொற்று காரணமாக தேர்வுகள் சற்று தள்ளிப்போய் இருக்கிறது. அதன்படி, 12-ம் வகுப்புக்கு பொதுத்தேர்வு மே மாதம் 5-ந்தேதி தொடங்கி 28-ந்தேதியுடன் நிறைவு பெறுகிறது.

அதேபோல், 11-ம் வகுப்பு மாணவர்களுக்கு மே மாதம் 9-ந்தேதி ஆரம்பித்து 31-ந்தேதி வரையும், 10-ம் வகுப்புக்கு மே மாதம் 6-ந்தேதி தொடங்கி 30-ந்தேதி வரையிலும் நடக்க இருக்கிறது.

இதுதவிர 6 முதல் 9-ம் வகுப்பு மாணவர்களுக்கு மே 5-ந்தேதி முதல் 13-ந்தேதி வரை ஆண்டு இறுதித்தேர்வு நடத்த வேண்டும் என்று தெரிவிக்கப்பட்டுள்ளது.

இதேபோல், 1 முதல் 5-ம் வகுப்பு வரையிலான மாணவர்களுக்கு மே 13-ந்தேதி கடைசி வேலைநாளாக அறிவிக்கப்பட்டுள்ளது.

இந்த நிலையில் அடுத்த கல்வியாண்டுக்கான (2022-23) வகுப்புகள் ஜூன் மாதம் 13-ந்தேதி தொடங்கும் என்றும், இதில் 11-ம் வகுப்பு மாணவர்களுக்கு மட்டும் 24-ந்தேதி முதல் வகுப்புகள் தொடங்கும் என்று தெரிவித்துள்ளார்.