அமித்ஷாவின் தமிழ்நாடு "மிஷன் 2026”: பாஜக மையக்குழுவுடன் தீவிர ஆலோசனை!

2026 சட்டப்பேரவை தேர்தலை முன்னிட்டு தமிழ்நாட்டில் பாஜக கட்சியை வலுப்படுத்த அக்கட்சி மைய குழுவுடன் அமித்ஷா ஆலோசனை நடத்த உள்ளார்.

பா.ஜ.க.வின் செல்வாக்கு உயர்வு மற்றும் கூட்டணி வியூகம்

சமீபத்தில் நடைபெற்ற மக்களவைத் தேர்தலில், தனித்துப் போட்டியிட்ட அ.தி.மு.க. ஒரு தொகுதியிலும் வெற்றி பெறவில்லை. ஆனால், பா.ஜ.க. தலைமையிலான தேசிய ஜனநாயகக் கூட்டணி (என்.டி.ஏ.) தமிழ்நாட்டின் 39 தொகுதிகளில் 10 இடங்களில் அ.தி.மு.மு.க.வை விட இரண்டாம் இடத்தைப் பிடித்து அனைவரையும் ஆச்சரியப்படுத்தியது.

இந்தச் செயல்பாடு, அ.தி.மு.க. தலைமைக்கு தீவிர கள ஆய்வை மேற்கொள்ள தூண்டியது.

இதனைத் தொடர்ந்து, 2026 சட்டமன்றத் தேர்தலில் பா.ஜ.க.வுடன் கூட்டணி அமைக்க வேண்டும் என அ.தி.மு.க. நிர்வாகிகள் மற்றும் தொண்டர்கள் மத்தியில் பலத்த விருப்பம் எழுந்தது.

அதன் அடிப்படையில், அ.தி.மு.க. பொதுச் செயலாளர் எடப்பாடி பழனிசாமி பல சுற்று பேச்சுவார்த்தைகளை நடத்தி, கடந்த மாதம் டெல்லியில் மத்திய உள்துறை அமைச்சர் அமித் ஷாவை சந்தித்தார்.

இந்த சந்திப்பு, தமிழ்நாட்டில் அ.தி.மு.க.-பா.ஜ.க. கூட்டணி மீண்டும் உருவாக வாய்ப்பு என்ற ஊகங்களை வலுப்படுத்தியது.

மேலும் இந்தக் கூட்டணி ஏப்ரல் 11 அன்று அமித்ஷா தமிழகம் வந்தபோது உறுதியானது.

அவரது வருகையின் போது, அமித்ஷா எடப்பாடி பழனிசாமியின் இல்லத்திற்குச் சென்று, அவர் அளித்த விருந்திலும் பங்கேற்றார். இந்த நிகழ்வு அ.தி.மு.க.வினரிடையே பெரும் வரவேற்பையும் உற்சாகத்தையும் ஏற்படுத்தியது.

தென் தமிழகத்தின் அரசியல் மையம்

சட்டமன்றத் தேர்தல்கள் நெருங்கி வருவதால், மாநில மற்றும் தேசிய கட்சிகள் தங்கள் வியூகங்களை தென் மாவட்டங்களில், குறிப்பாக மதுரையில் குவித்து வருகின்றன.

முக்கிய தொகுதிகளில் வெற்றி பெறுவதே அவர்களின் இலக்கு. சமீபத்தில், தி.மு.க. தனது பொதுக்குழு கூட்டத்தை மதுரையில் நடத்தியது, இதில் பா.ஜ.க.வுக்கு எதிரான தீர்மானங்கள் உட்பட 22 தீர்மானங்கள் நிறைவேற்றப்பட்டன.

இதற்கு பதிலடி கொடுக்கும் விதமாக, பா.ஜ.க.வும் வரவிருக்கும் தேர்தலுக்குத் தாங்கள் தயாராகிவிட்டதை உணர்த்தும் வகையில் மதுரையில் ஒரு பிரம்மாண்டமான நிகழ்வை ஏற்பாடு செய்தது.

இதன்படி, இன்று (ஞாயிற்றுக்கிழமை), மதுரையில் பெரிய அளவிலான பா.ஜ.க. செயற்குழு கூட்டம் நடைபெறுகிறது.

ஒத்தக்கடை வேலம்மாள் திடலில் நடைபெறும் இந்தக் கூட்டத்தில் மத்திய உள்துறை அமைச்சர் அமித் ஷா பங்கேற்று, 2026 தமிழக சட்டமன்றத் தேர்தலில் வெற்றி பெறுவதற்கான வியூகம் குறித்து ஆலோசனை வழங்குகிறார்.

நேற்று இரவு 10:30 மணியளவில் டெல்லியில் இருந்து தனி விமானம் மூலம் அமித் ஷா மதுரை வந்தடைந்தார்.

விமான நிலையத்தில் அவரை மாநில பா.ஜ.க. தலைவர் நயினார் நாகேந்திரன், மத்திய அமைச்சர் எல். முருகன், முன்னாள் மத்திய அமைச்சர் பொன். ராதாகிருஷ்ணன், முன்னாள் ஆளுநர் தமிழிசை சவுந்தரராஜன், சட்டமன்ற உறுப்பினர் வானதி சீனிவாசன், மாநில பொதுச் செயலாளர் பேராசிரியர் இராம. சீனிவாசன் உள்ளிட்ட முக்கிய பா.ஜ.க. தலைவர்கள் வரவேற்றனர்.

மதுரையின் சிந்தாமணி பகுதியில் உள்ள ஒரு நட்சத்திர விடுதியில் இரவு ஓய்வெடுத்த அமித் ஷா, இன்று காலை உலகப் புகழ்பெற்ற மீனாட்சி அம்மன் கோவிலுக்குச் சென்று தரிசனம் செய்தார். பின்னர் மீண்டும் தனது விடுதிக்குத் திரும்பி பா.ஜ.க.வின் முக்கிய குழு கூட்டத்தில் பங்கேற்றார்.

முக்கிய விவாதங்கள்

வழக்கமாக முக்கிய குழு கூட்டங்கள் ஒரு நாள் முழுவதும் நடைபெறும். ஆனால் அமித் ஷாவின் குறைந்த கால வருகை காரணமாக, இன்றைய கூட்டம் சுருக்கமாக நடைபெறுகிறது.

இந்தக் கூட்டத்தில் நயினார் நாகேந்திரன், எல். முருகன், மத்திய பார்வையாளர்கள் அரவிந்த் மேனன் மற்றும் சுதாகர் ரெட்டி, பொன். ராதாகிருஷ்ணன், முன்னாள் மாநிலத் தலைவர் அண்ணாமலை, வானதி சீனிவாசன், ராம. சீனிவாசன், தமிழிசை சவுந்தரராஜன், கே.பி. இராமலிங்கம், கரு. நாகராஜன், கருப்பு முருகானந்தம், கார்த்தியாயினி, பொன். பாலகணபதி, ஏ.பி. முருகானந்தம், கனகசபாபதி, வி.பி. துரைசாமி மற்றும் எச். ராஜா உட்பட 22 முக்கிய தலைவர்கள் பங்கேற்றுள்ளனர்.

அ.தி.மு.க.-பா.ஜ.க. கூட்டணி அமைந்த பிறகு தற்போதைய அரசியல் சூழல் குறித்தும் அவர் ஆய்வு செய்தார்.

[

2026 சட்டமன்றத் தேர்தலில் தேசிய ஜனநாயகக் கூட்டணி வெற்றி பெற்று ஆட்சி அமைப்பதற்கான ஆலோசனைகளை அமித் ஷா முக்கிய குழு உறுப்பினர்களுக்கு வழங்கவுள்ளார்.

மேலும், தமிழ்நாட்டில் பா.ஜ.க.வுக்கு வெற்றி வாய்ப்புள்ள தொகுதிகள், தென் மாவட்டங்களில் பா.ஜ.க. நல்ல வளர்ச்சி அடைந்திருப்பதால் அங்கு கூடுதல் தொகுதிகளில் போட்டியிடுதல், மற்றும் கள ஆய்வுகள் மூலம் தி.மு.க.வுக்கு எதிரான வாக்காளர்களின் மனநிலையை பா.ஜ.க.வுக்கு ஆதரவான வாக்குகளாக மாற்றுவது உள்ளிட்டவை குறித்தும் ஆலோசனை நடத்தினார்.

அமித் ஷாவின் "மிஷன் 2026”

இன்று மாலை 4 மணியளவில் ஒத்தக்கடை வேலம்மாள் திடலில் அமைக்கப்பட்டுள்ள பிரம்மாண்ட பந்தலில் நடைபெறும் பா.ஜ.க. நிர்வாகிகளுடனான ஆலோசனை கூட்டத்தில் அமித் ஷா கலந்துகொண்டு பேசவுள்ளார்.

டிரம்ப்புடனான நேரடி மோதல்:"தி அமெரிக்கன் பார்ட்டி" என்ற புதிய கட்சியை அறிவித்த எலான் மஸ்க்!

மகாராஷ்டிரா, உத்தரப் பிரதேசம், குஜராத் உள்ளிட்ட மாநிலங்களில் வெற்றி வியூகம் வகுத்து ஆட்சி பிடிக்கக் காரணமாக இருந்த அமித் ஷாவின் தமிழக வருகையும் ஒரு மாற்றத்தை ஏற்படுத்தும் என்று பா.ஜ.க.வினர் நம்பிக்கையுடன் கூறி வருகின்றனர்.

அதற்கேற்ப, "மிஷன் 2026" என்ற இலக்கை நிர்ணயித்து, தி.மு.க. ஆட்சியை வீட்டுக்கு அனுப்பும் வகையில் புதிய திட்டங்களுடன் கூடிய தேர்தல் வியூகத்தை அமித்ஷா தயாராக வைத்துள்ளதாகக் கூறப்படுகிறது.

மேலும், மக்களவைத் தேர்தலில் 10 தொகுதிகளில் மிகப்பெரிய அளவில் இரண்டாம் இடத்தைப் பிடித்ததோடு, அதில் அடங்கியுள்ள சட்டமன்றத் தொகுதிகளை கட்டாயம் வென்றாக வேண்டும், தமிழ்நாட்டில் இரண்டாவது பெரிய கட்சியாக பா.ஜ.க. காலூன்ற வேண்டும் என்பதற்காக அமித் ஷா நேரடியாக களமிறங்குகிறார்.

தற்போது கூட்டணியில் உள்ள அ.தி.மு.க., அ.ம.மு.க., ஓ.பி.எஸ்.ஸின் அ.தி.மு.க. உரிமை மீட்பு குழு ஆகியவற்றுடன் பா.ம.க., தே.மு.தி.க. உள்ளிட்ட கட்சிகளையும் ஒருங்கிணைக்க அமித் ஷா திட்டமிட்டுள்ளார்.

மேலும், அமித் ஷாவின் இந்த மதுரை பயணத்தின்போது, பா.ஜ.க. மாநில நிர்வாகிகளை தனித்தனியாக சந்தித்து தேர்தலுக்கான பணிகள் குறித்து ஆலோசனைகள் வழங்கவுள்ளார். கட்சியின் கூட்டணி நிலைப்பாடுகள் குறித்தும் இந்தக் கூட்டங்களில் விவாதிக்கப்படவுள்ளது.

சாத்தியமான சந்திப்புகள்

இன்று மாலை மதுரையில் அமித்ஷா, ஓ.பி.எஸ். மற்றும் டி.டி.வி. தினகரன் ஆகியோரைச் சந்திக்க வாய்ப்புள்ளதாகவும் கூறப்படுகிறது.

இதன் மூலம் தென் மாவட்டங்கள் உட்பட தமிழகம் முழுவதும் அவர்களுக்கான வாக்கு வங்கியை அ.தி.மு.க.-பா.ஜ.க. கூட்டணிக்குக் கொண்டு வரவும் திட்டமிட்டு, அதற்கான வழிமுறைகளையும் அமித் ஷா இன்று மாலை நடைபெறும் கூட்டத்தில் நிர்வாகிகளுக்கு அறிவுறுத்த இருக்கிறார்.

இன்று மதுரையில் அமித் ஷா பங்கேற்கும் பா.ஜ.க. நிர்வாகிகள் ஆலோசனை கூட்டம் 2026 சட்டமன்றத் தேர்தலுக்கான பிரச்சாரத்தின் தொடக்கம் என்றும், கட்சியினருக்கு புதிய ஊக்கத்தை அளிப்பதாகவும் அமையும் என்றும் கட்சியினர் தெரிவித்தனர்.