தேன் போல இனித்திடும் வாக்குறுதி - ஸ்டாலினுக்கு ஏ.ஆர்.ரகுமான் டுவிட்!

தேன்போல இனித்திடும் வாக்குறுதி என்று மு.க.ஸ்டாலினுக்கு இசையமைப்பாளர் ஏ.ஆர்.ரகுமான் டுவிட்டரில் வாழ்த்து தெரிவித்துள்ளார்.

தமிழக சட்டமன்ற பொதுத் தேர்தலில் திமுக அமோக வெற்றி பெற்றுள்ளது. இதனையடுத்து 10 ஆண்டுகளுக்கு பிறகு வரும் 7ம் தேதி தமிழகத்தின் அடுத்த முதல்வராக மு.க.ஸ்டாலின் பதவி ஏற்க இருக்கிறார். இந்தத் தருணத்திற்காக கோடானக் கோடி திமுகவினர் காத்துக் கொண்டிருக்கின்றனர்.

இதனையடுத்து, மு.க.ஸ்டாலினுக்கு அரசியல் தலைவர்கள், சினிமா நட்சத்திரங்கள், முக்கிய பிரமுகர்கள் உள்ளிட்ட பலர் வாழ்த்துத் தெரிவித்து வருகின்றனர்.

இந்நிலையில், இசையமைப்பாளர் ஏ.ஆர். ரஹ்மான் தனது டுவிட்டர் பக்கத்தில், சமூக நீதி, கல்வி, சுகாதாரம் ஆகியவற்றில் தமிழ்நாடு வரலாறு காணாத வளர்ச்சியடைய, இந்தியாவின் ஒருமைப்பாட்டிற்கு ஓர் எடுத்துக்காட்டாய்த் திகழ, தி.மு.க கூட்டணிக்கு என் மனமார்ந்த வாழ்த்துகள்!” என்று பதிவிட்டார்.

இதற்கு நன்றி தெரிவித்த மு.க. ஸ்டாலின் தனது டுவிட்டர் பக்கத்தில், இசைப்புயல் – ஆஸ்கர் விருதாளரான தங்களின் வாழ்த்துகளுக்கு நெஞ்சார்ந்த நன்றி. தமிழக மக்கள் சார்பில் தாங்கள் வைத்துள்ள நம்பிக்கையை நிறைவேற்றிடும் வகையில் புதிய அரசு செயல்படும் என்று பதிலளித்து பதிவிட்டிருந்தார்.

இதனையடுத்து, மு.க.ஸ்டாலினின் ட்வீட்டுக்கு பதிலளித்துள்ள ஏ .ஆர்.ரஹ்மான், கோவிட் பெருந்தொற்றால் அல்லல்படும் தமிழர்களுக்கு இது, தேன் போல இனித்திடும் வாக்குறுதி. இந்த வாக்குறுதி பலித்திட எல்லாம் வல்ல இறைவனை வேண்டுகிறேன் என்று மு.க.ஸ்டாலினை வாழ்த்து பதிவிட்டுள்ளார்.