ரயிலில் இருந்து கீழே விழுந்த மாணவி உயிரிழப்பு - உறவினர்கள் முற்றுகை போராட்டம் !

மர்ம நபர்கள் செல்போன் பறிக்க முயன்றபோது நிலை தடுமாறி ரயிலிலிருந்து கீழே விழுந்த மாணவி உயிரிழந்துள்ளார்.  

செல்போன் பறிப்பு

சென்னையில் கடந்த 2 ஆம் தேதி அதிகாலை இந்திரா நகர் ரயில் நிலையத்தில் மின்சார ரயிலில் பயணம் செய்து கொண்டிருந்த ப்ரீத்தி என்ற மாணவியிடம் மர்ம நபர்கள் செல்போன் பறிப்பில் ஈடுபட்டனர். அப்போது நிலைதடுமாறிய மாணவி ஓடும் ரயிலிலிருந்து கீழே விழுந்து பலத்த காயம் அடைந்தார்.

இதனையடுத்து அவர் ராயப்பேட்டை அரசு மருத்துவமனையில் அனுமதிக்கப்பட்டார். இதுகுறித்து திருவான்மியூர் ரயில்வே போலீசார் அந்த மர்ம நபர்கள் மீது வழக்குப் பதிவு செய்து விசாரணை மேற்கொண்டு வந்தனர்.

மாணவி உயிரிழப்பு

இந்நிலையில் மருத்துவ மனையில் சிகிச்சை பெற்று வந்த மாணவி இன்று சிகிச்சை பலனின்றி உயிரிழந்தார். இதன் காரணமாக மாணவியின் குடும்பத்தினர் மர்ம நபர்களை பிடிக்காமல் உடலை வாங்கமாட்டோம் என ராயப்பேட்டை அரசு மருத்துவமனையில் முற்றுகை போராட்டத்தில் ஈடுபட்ட நிலையில்  கொள்ளையர்கள் விக்னேஷ், மணிமாறன் ஆகியோரை கைது செய்து போலீசார் நடவடிக்கை எடுத்துள்ளனர்.