டிம் பெயின் விலகல் - புதிய கேப்டனாக பரிந்துரைக்கப்பட்ட கிரிக்கெட் வீரர்

2017ம் ஆண்டு நடந்த டெஸ்ட் போட்டியின் போது பந்தை சேதப்படுத்திய காரணத்திற்காக அப்போதைய ஆஸ்திரேலிய டெஸ்ட் கேப்டன் ஸ்டீவ் ஸ்மித்தின் பதவி பறிக்கப்பட்டு டிம் பெயினிடம் வழங்கப்பட்டது. அப்போதிலிரந்து ஆஸ்திரேலிய டெஸ்ட் கிரிக்கெட் அணியின் கேப்டன் மற்றும் விக்கெட் கீப்பராக டிம் பெயின் செயல்பட்டு வருகிறார்.

இந்நிலையில் சக பெண் ஊழியருக்கு தவறான செய்திகளை அனுப்பியதாக டிம் பெயின் மீது பாலியல் புகார் எழுந்தது. இதனையடுத்து, அவரது கேப்டன் பதவியை ராஜினாமா செய்வதாக அறிவித்தார்.

இது குறித்து, ஆஸ்திரேலிய கிரிக்கெட் வாரிய சேர்மன் ரிச்சர்ட் பிரெடென்ஸ்டீன் நேற்று பேசுகையில், ‘இந்த விவகாரம் குறித்து 2018-ம் ஆண்டு விசாரணை நடத்தப்பட்டபோது டிம் பெய்னின் செயலை ஏற்றுக்கொண்டு தீவிர நடவடிக்கை எடுக்காமல் விட்டது தவறானது. அப்போதே அவரது கேப்டன் பதவியை பறித்திருக்க வேண்டும். ஆஸ்திரேலிய கேப்டன் என்பவர் மிக உயரிய தரத்துடன் இருக்க வேண்டும்’ என்றார்.

இந்நிலையில், ஆஸ்திரேலிய டெஸ்ட் கிரிக்கெட் அணியின் கேப்டன் பதவியிலிருந்து டிம் பெய்ன் விலகியதால், அடுத்த கேப்டன் யார் என்ற கேள்வி தற்போது எழுந்திருக்கிறது. அடுத்த கேப்டனுக்கான வாய்ப்பில் துணை கேப்டனான வேகப்பந்து வீச்சாளர் பேட் கம்மின்ஸ் முன்னிலையில் உள்ளார். ஆனால், முன்னாள் கேப்டனும், பேட்ஸ்மேனுமான ஸ்டீவன் சுமித்தும் கேப்டனுக்கான போட்டியிலிருப்பது தெரிய வந்துள்ளது.

தேர்வாளர்கள் அவரது பெயரையும் கிரிக்கெட் வாரியத்திற்கு பரிந்துரை செய்திருப்பதாக தகவல்கள் வெளியாகி இருக்கிறது. இங்கிலாந்து கிரிக்கெட் அணி ஆஸ்திரேலியாவில் சுற்றுப்பயணம் மேற்கொண்டு 5 போட்டிகள் கொண்ட ஆஷஸ் டெஸ்ட் தொடரில் பங்கேற்கிறது.

ஆஸ்திரேலியா-இங்கிலாந்து இடையிலான முதலாவது டெஸ்ட் அடுத்த மாதம் 8-ம் தேதி பிரிஸ்பேனில் நடைபெற உள்ளது. ஆஷஸ் தொடரின் முதல் 2 டெஸ்ட் போட்டிக்கான 15 பேர் கொண்ட ஆஸ்திரேலிய அணி கடந்த 17ம் தேதி அறிவிக்கப்பட்டுள்ளது.