20 ஓவர் கிரிக்கெட் போட்டி - தரவரிசையில் முன்னேறிய இரு வீரர்கள்

சர்வதேச கிரிக்கெட் கவுன்சில் (ஐ.சி.சி.) 20 ஓவர் போட்டி வீரர்களின் புதிய தரவரிசை பட்டியலை நேற்று வெளியிட்டிருந்தது.

இந்த தர வரிசையில், பேட்ஸ்மேன்களின் டாப்-3 இடங்களில் மாற்றம் ஏதும் இல்லை. பாகிஸ்தான் கேப்டன் பாபர் அசாம் முதலிடத்திலும், இங்கிலாந்தின் டேவிட் மலான் 2- வது இடத்திலும், தென்ஆப்பிரிக்காவின் மார்க்ராம் 3-வது இடத்திலும் தொடர்ந்துள்ளனர்.

நியூசிலாந்தின் டிவான் கான்வே 3 இடங்கள் ஏற்றம் கண்டு 4-வது இடத்துக்கு முன்னேறி இருக்கிறார். பாகிஸ்தான் விக்கெட் கீப்பர் முகமது ரிஸ்வான் 1 இடம் உயர்ந்து 5-வது இடத்தை பிடித்திருக்கிறார். இந்தியாவின் லோகேஷ் ராகுல் 5-ல் இருந்து 6-வது இடத்துக்கு சறுக்கியுள்ளார். மற்ற இந்திய வீரர்கள் விராட் கோலி 8-வது இடத்திலும், ரோகித் சர்மா 16-வது இடத்திலும் இருக்கிறார்கள்.

20 ஓவர் உலக கோப்பை கிரிக்கெட்டின் தொடர்நாயகனாக ஜொலித்த ஆஸ்திரேலிய வீரர் டேவிட் வார்னர் 8 இடங்கள் எகிறி 33-வது இடத்தையும், ஆட்டநாயகனாக தேர்வான மிட்செல் மார்ஷ் 6 இடங்கள் முன்னேறி 13-வது இடத்தையும் பெற்றிருக்கிறார்கள். நியூசிலாந்து கேப்டன் கேன் வில்லியம்சன் 7 இடங்கள் அதிகரித்து 32-வது இடத்தில் உள்ளார்.

பந்து வீச்சாளர்களின் தரவரிசையில் ஹசரங்கா (இலங்கை) முதலிடமும், தப்ரைஸ் ஷம்சி (தென்ஆப்பிரிக்கா) 2-வது இடமும் வகித்து வருகிறார்கள். உலக கோப்பை கிரிக்கெட்டில் மொத்தம் 13 விக்கெட்டுகள் கைப்பற்றிய ஆஸ்திரேலிய சுழற்பந்து வீச்சாளர் ஆடம் ஜம்பா 5லிருந்து 3-வது இடத்துக்கு முன்னேறியிருக்கிறார்கள். டாப்-10 இடங்களில் இந்திய பவுலர்கள் யாரும் இடம் பெற கிடையாது.