2024-ம் ஆண்டு 20 ஓவர் உலக கோப்பை கிரிக்கெட் போட்டி எங்கு நடக்கப்போகுதுன்னு தெரியுமா? இதோ

2024-2031-ம் ஆண்டு காலகட்டத்தில் நடைபெற உள்ள 50 ஓவர் உலக கோப்பை, 20 ஓவர் உலக கோப்பை, சாம்பியன்ஸ் கோப்பை போட்டிகள் எந்தெந்த நாடுகளில் நடைபெறும் என்பதை சர்வதேச கிரிக்கெட் கவுன்சில் ஐ.சி.சி. நேற்று அதிகாரபூர்வமாக அறிவித்திருந்தது.

2024-ம் ஆண்டுக்கான 20 ஓவர் உலக கோப்பை போட்டி ஜூன் மாதத்தில் அமெரிக்கா மற்றும் வெஸ்ட்இண்டீசில் நடைபெற உள்ளது. அமெரிக்காவில் உலக கோப்பை கிரிக்கெட் போட்டி நடைபெற இருப்பது இதுவே முதல்முறை.

அமெரிக்காவில் கிரிக்கெட்டை பிரபலப்படுத்தவும், 2028-ம் ஆண்டு லாஸ் ஏஞ்சல்சில் நடைபெறும் ஒலிம்பிக் போட்டியில் கிரிக்கெட்டை அறிமுகப்படுத்தும் நோக்கிலும் இந்த 20 ஓவர் உலக கோப்பை போட்டியை அங்கு நடத்த அனுமதி வழங்கப்பட்டது.

2024-ம் ஆண்டு முதல் 20 ஓவர் உலக கோப்பை போட்டியில் கலந்து கொள்ளும் அணிகளின் எண்ணிக்கை 16-ல் இருந்து 20 ஆகவும், 2027-ம் ஆண்டு முதல் 50 ஓவர் உலக கோப்பை போட்டியில் பங்கேற்கும் அணிகளின் எண்ணிக்கை 10-ல் இருந்து 14 ஆகவும் அதிகரிக்கப்படுகிறது. அத்துடன் போட்டி அட்டவணை முறையிலும் மாற்றம் செய்யப்பட உள்ளது.