அரையிறுதி வாய்ப்பை இந்திய அணி தக்க வைத்துக் கொள்ளுமா? இன்று ஸ்காட்லாந்து அணியுடன் மோதல்

இன்று டி20 உலகக் கோப்பை 'சூப்பர் 12' சுற்று ஆட்டத்தில் அனுபவமற்ற ஸ்காட்லாந்து அணியை எதிர்கொள்ள உள்ளது இந்தியா.

20 ஓவர் உலகக் கோப்பை கிரிக்கெட் தொடரில் பாகிஸ்தான், நியூசிலாந்து அணிகளிடம் படுதோல்வி அடைந்தது இந்திய அணி. இதனையடுத்து, ஆப்கானிஸ்தானை 66 ரன்கள் வித்தியாசத்தில் வீழ்த்தி தனது முதல் வெற்றியை பதிவு செய்தது.

இந்நிலையில், கத்துக்குட்டி அணியான ஸ்காட்லாந்துக்கு எதிரான இன்றைய ஆட்டத்திலும், 'அபார' வெற்றியை தொடர வேண்டிய நிலையில் இந்தியா இருக்கிறது.

ஆப்கானிஸ்தான் அணிக்கெதிரான கடந்த போட்டியில் ஓபனிங் பேட்ஸ்மேன்கள் ரோகித் ஷர்மா மற்றும் கேஎல் ராகுல் இருவரும் பழைய ஃபார்முக்கு திரும்பி இருப்பது நம்பிக்கை அளிக்கும் விதமாக உள்ளது.

இன்று நடக்கும் போட்டியில் இவர்கள் மீண்டும் ரன் மழை பொழிவார்கள் என எதிர்பார்க்கப்படுகிறது. 'மிடில்-ஆர்டரில்' அசத்திய விக்கெட் கீப்பர் ரிஷாப் பண்ட், 'ஆல்-ரவுண்டர்' ஹர்திக் பாண்ட்யாவின் அதிரடி ஆட்டம் தொடர்ந்தால் மீண்டும் இமாலய ஸ்கோரை குவித்து விடலாம். ஏறக்குறைய 4 ஆண்டுகளுக்குப் பிறகு மீ்ண்டும் வொய்ட் பால் ஃபார்மெட்டுக்கு திரும்பிய அஸ்வின், ஆப்கானிஸ்தானுக்கு எதிரான ஆட்டத்தில் தன்னுடைய ஃபார்மை நிரூபித்தார்.

4 ஓவர்கள் வீசிய அவர் 14 ரன்கள் மட்டுமே கொடுத்து 2 விக்கெட்டுகளை வீழ்த்தினார். இன்றைய போட்டியிலும் 'சுழலில்' அஷ்வின் மிரட்டலாம். வேகப்பந்து வீச்சில் முகமது ஷமி, ஜஸ்பிரித் பும்ரா நம்பிக்கை அளிக்கிறார்கள்.

இத்தொடரில் இதுவரை ஆடிய 3 ஆட்டங்களிலும் ஒரு வெற்றி கூட பெறாத ஸ்காட்லாந்து அணியின் அரையிறுதி வாய்ப்புக்கான கதவு மூடப்பட்டிருக்கிறது. எனவே இன்றைய போட்டியில் ஆறுதல் வெற்றி பெற அந்த அணி முயற்சி செய்யக்கூடும். அதனால் இன்றைய ஆட்டம் விறுவிறுப்பாக இருக்கும் என்று எதிர்பார்க்கப்படுகிறது. இந்திய அணி அரை இறுதி சுற்றுக்கு தகுதி பெற மீதமுள்ள இரு போட்டிகளிலும் (ஸ்காட்லாந்து, நமீபியா) இமாலய வெற்றி பெற வேண்டிய அவசியம்.

மற்றொரு போட்டியில் நியூசிலாந்து அணி, ஆப்கானிஸ்தானிடம் தோல்வியடைய வேண்டும். இவ்வாறு நடந்தால் இந்தியா, ஆப்கானிஸ்தான், நியூசிலாந்து அணிகள் தலா 6 புள்ளிகள் பெறும். 'ரன் ரேட்' அடிப்படையில் இந்திய அணிக்கு அரை இறுதி வாய்ப்பு கிடைக்கும்.

இந்திய நேரப்படி இன்று இரவு 7.30 மணிக்கு தொடங்கும் இப்போட்டியை ஸ்டார் ஸ்போர்ட்ஸ் சேனல்கள் நேரடி ஒளிபரப்பு செய்ய உள்ளன. இன்று சார்ஜாவில் நடக்கவுள்ள மற்றொரு 'குரூப்-2' போட்டியில் நியூசிலாந்து, நமீபியா அணிகள் மோத இருக்கின்றன.