பழங்காலத்தில் போர்க்களமாக விளங்கிய புதுக்கோட்டையின் வரலாறு தெரியுமா?

தென்னிந்தியாவில் முக்கிய மாவட்டமான புதுக்கோட்டையின் வரலாறு பற்றி தெரிந்துகொள்ளுங்கள்.

புதுக்கோட்டை மாவட்டம்

இந்தியாவின் தென் மாநிலமான தமிழ்நாட்டில் அமைந்துள்ளது புதுக்கோட்டை மாவட்டம். இம்மாவட்டம் தமிழ்நாட்டின் கிழக்குப் பகுதியில் அமைந்துள்ளது, மேற்கில் திருச்சிராப்பள்ளி, வடக்கே தஞ்சாவூர் மற்றும் தென்கிழக்கில் இராமநாதபுரம் ஆகிய மாவட்டங்களின் எல்லையாக உள்ளது. இந்த மாவட்டம் வளமான கலாச்சார பாரம்பரியத்தையும், துடிப்பான வரலாற்றையும் கொண்டுள்ளது.

புதுக்கோட்டை என்றால் புதிய கோட்டை என்று பொருள், பண்டைய காலத்தில் சோழநாட்டிற்கும், பாண்டிய நாட்டிற்கும் எல்லை பகுதியாக புதுக்கோட்டை அமைந்திருந்தது. இந்த பகுதி அனைத்து அரச மன்னர்களுக்கும் போர்க்களமாக இருந்துள்ளது. தற்பொழுது அந்த போர்க்களங்கள் அழிந்துவிட்டதாக கூறப்படுகிறது.

வரலாறு

புதுக்கோட்டை மாவட்டம் செழுமையும், தொன்மையும் கொண்டது. இப்பகுதி சோழர்கள், பாண்டியர்கள் மற்றும் விஜயநகரப் பேரரசு உட்பட பல்வேறு வம்சங்களால் ஆளப்பட்டது. புதுக்கோட்டை ராஜ்ஜியம் 17-ம் நூற்றாண்டில் விஜயநகரப் பேரரசின் வழித்தோன்றல் ரகுநாத ராய தொண்டைமான் என்பவரால் நிறுவப்பட்டது.

1947 இல் இந்தியா சுதந்திரம் அடையும் வரை, நான்கு நூற்றாண்டுகளுக்கும் மேலாக தொண்டைமான் குடும்பத்தால் இந்த ராஜ்ஜியம் ஆளப்பட்டது. புதுக்கோட்டை ராஜ்ஜியம் 1948 இல் மெட்ராஸ் பிரசிடென்சியுடன் இணைக்கப்படும் வரை பிரிட்டிஷ் இந்தியாவின் கீழ் ஒரு சமஸ்தானமாக இருந்தது.

ரகுநாதராய தொண்டைமான்

இவர் புதுக்கோட்டை தொண்டைமானின் 'முதல் அரசர்' ஆவார். இவர் கிபி 1661-ல் பொறுப்பேற்றார். இவர் தஞ்சை அச்சுத விஜயராகவ நாயக்கரின் போர்களில் கலந்து அவருக்கு வெற்றியை தேடி தந்தார். ஆகவே, தஞ்சை நாயக்கர் அவருக்கு ஒரு பெரிய ' ராமபாணம்' என்ற வாளை அளித்தார். மதுரையில் இராணி மங்கம்மாளுக்கு 'ருஸ்தம்கான்' என்பவனால் தொல்லை இருந்தது.

ஆகவே அவரை அடக்க புதுக்கோட்டை ரகுநாதராயத் தொண்டைமான் உதவியை நாடினார். ரகுநாதனும், மங்கம்மாளுக்கு உதவி செய்து, அவரை ருஸ்தம்கான் பிடியில் இருந்து காப்பாற்றினார். இதற்கு நன்றியாக இராணி மங்கம்மாள், ரகுநாத ராயத் தொண்டைமானை, பன்னிரண்டு கள்ளர் குடிகளுக்கு தலைமையாக இருக்கும் உரிமையையும், திருச்சியில் ' அரசு காவலராக' இருக்கும் உரிமையையும் கொடுத்தார்.

இராமநாதபுரம் கிழவன் சேதுபதி, தொண்டைமானின் வீரத்தை கேள்விப்பட்டு, தன்னுடைய படைக்கு தலைவராக்கிக் கொண்டார். தொண்டைமானும், இராமநாதபுரம் சேதுபதி பல போர்களில் உதவியதால், அவரை புதுக்கோட்டைப் பகுதிகள் முழுவதற்கும் மன்னராக செய்தார்.

புதுக்கோட்டை சமஸ்தான அம்மன் காசு

புதுக்கோட்டை தொண்டைமான் மன்னர்கள் சொந்தமாக ஒரு நாணயத்தை வெளியிட்டார்கள். அதன் பெயர் அம்மன் காசு. அதன் ஒருபுறத்தில் தொண்டைமான்களின் வழிபாட்டு தெய்வமாகிய பிரகதாம்பாளின் உருவம் இருக்கும். ஆகையால்தான் 'புதுக்கோட்டை அம்மன் காசு' என்ற பெயர்.

'புதுக்கோட்டை அம்மன் சல்லி' என்றும் அழைப்பார்கள். பிரிட்டிஷ் இந்தியாவின் ஒரு பைசாவுக்கு மூன்று அம்மன் காசுகள் சமம். இந்தக் காசை அவர்கள் பெற்ற உரிமையின் அடையாளமாக வெளியிட்டுக்கொண்டார்கள்.

அந்த நாட்டின் அதிபதி பிரகதாம்பாள். அவளுடைய பிரதிநிதியாகத்தான் தொண்டைமான்கள் ஆண்டுவந்தனர். பிரகதாம்பாள்தாச என்றுதான் அவர்களுடைய விருதுகள் தொடங்கும்.

பாரம்பரியம்

இங்கு பழங்கால கோவில்கள், பாரம்பரிய திருவிழாக்கள் மற்றும் கலை மற்றும் கைவினைகளுக்கு இந்த மாவட்டம் பெயர் பெற்றது. ஆந்திராவுக்கு அருகாமையில் இருப்பதால் இம்மாவட்டம் தமிழ் மற்றும் தெலுங்கு கலாச்சாரங்களின் தனித்துவமான கலவையைக் கொண்டுள்ளது.

மாவட்டத்தில் கொண்டாடப்படும் முக்கிய பண்டிகைகள் பொங்கல், தீபாவளி மற்றும் நவராத்திரி. வெண்கலம் மற்றும் பித்தளை வேலைகள், கல் செதுக்குதல் மற்றும் மர வேலைப்பாடுகள் உள்ளிட்ட பாரம்பரிய கைவினைப் பொருட்களுக்கும் இந்த மாவட்டம் அறியப்படுகிறது.

பொருளாதாரம்

புதுக்கோட்டை மாவட்டத்தின் பொருளாதாரம் விவசாயத்தை அடிப்படையாகக் கொண்டது. நெல், நிலக்கடலை, கரும்பு மற்றும் தென்னை உற்பத்திக்கு பெயர் பெற்றது. மாவட்டத்தில் பட்டு மற்றும் பருத்தி துணிகள் உற்பத்தியுடன், கைத்தறித் தொழில் செழித்து வருகிறது.

இம்மாவட்டத்தில் ரசாயனம், சிமென்ட் மற்றும் இரும்பு ஆலைகள் உட்பட பல சிறிய மற்றும் நடுத்தர தொழில்கள் உள்ளன. மாவட்டத்தில் கணிசமான அளவில் கிரானைட் குவாரிகளும் உள்ளன.

நார்த்தாமலை

முத்தரையர்களின் படைத் தலங்களில் தலைமையிடமாக நார்த்தாமலை விளங்கி வந்துள்ளது. முத்தரையா்களின் வட்ட வடிவிலான கற்கோவில், விஜயலாய சோழனின் குகை கோவில் மற்றும் கடம்பர் மலை கோவில் ஆகிய கோவில்கள் இவ்வூரில் அமைந்துள்ளது.

தற்காலத்தில் அருள்மிகு முத்துமாரியம்மன் கோயிலும் மிகவும் பிரசித்தி பெற்று விளங்குகிறது. இங்கு நடைபெறும் முளைபாரி ஊா்வலம் மிகவும் சிறப்பு வாய்ந்ததாக பார்க்கப்படுகிறது.

குடுமியான்மலை

குடுமியான்மலை பழங்கால வரலாறு மற்றும் கலை ஆகியவற்றை தெளிவாக அறிந்து கொள்ள உதவும் குடைவரை கோயில்கள் இங்குள்ளன. ஒரு மலை குன்றின் மீது சிக்கநாதீஸ்வரன் மூலவராக கொண்ட சிவபெருமான் கோவில் ஒன்று அமைந்துள்ளது.

அதனை சுற்றி நான்கு சிறு கோவில்களும் அவற்றில் சிற்பங்களும் காண்பவா் கண்ணுக்கு விருந்தாக அமைகிறது.

இங்கு அமைந்துள்ள குகை கோவிலின் முகப்பில் கா்நாடக சங்கீதத்திற்கு இலக்கணம் சொல்லும் இசை கல்வெட்டு ஒன்றும் 100-க்கு மேற்பட்ட கல்வெட்டுகளும் உள்ளது.