மறுமணம் செய்யவுள்ள பிரபல இசையமைப்பாளர் - தமிழ் சினிமா ரசிகர்கள் குஷி
பிரபல இசையமைப்பாளர் டி. இமான் விரைவில் மறுமணம் செய்யவுள்ளதாக தகவல் வெளியாகியுள்ளது.
தமிழ் சினிமாவில் விஜய் நடித்த தமிழன் படம் மூலம் அறிமுகமாகி தற்போது முன்னணி இசையமைப்பாளர்களில் ஒருவராக உள்ள டி.இமான் தனது மனைவி மோனிகா ரிச்சர்டை கடந்த டிசம்பர் மாதம் விவாகரத்து செய்வதாக அறிவித்து அதிர்ச்சியை ஏற்படுத்தினார். கடந்த 2008 ஆம் ஆண்டு திருமணம் செய்துக் கொண்ட இந்த தம்பதியினருக்கு 2 குழந்தைகள் உள்ளனர்.
இதனிடையே இமான் தனது ட்விட்டர் பதிவில், வாழ்க்கை நம்மை பல்வேறு பாதைகளுக்கு இட்டுச் செல்லும். அந்த வகையில் எனது மனைவி மோனிகா ரிச்சர்டும் நானும் சட்டரீதியாக விவாகரத்து பெற்று பிரிந்து விட்டோம்.
இனி நாங்கள் கணவன்-மனைவி இல்லை. எனது நலன் மீது அக்கறை கொண்டவர்கள், இசை ரசிகர்கள், ஊடகத்துறையினர் அனைவரும் எங்கள் தனிப்பட்ட உணர்வுகளுக்கு மதிப்பளித்து, வாழ்க்கையில் நாங்கள் முன்னோக்கிச் செல்ல உதவுமாறு கேட்டுக் கொள்கிறேன் என தெரிவித்திருந்தார்.
இந்நிலையில் இமான் மறுமணம் செய்ய உள்ளதாக தகவல்கள் வெளியாகியுள்ளது.மே மாதம் திருமணம் செய்யவுள்ளதாக கூறப்படும் நிலையில் விரைவில் இதுகுறித்த அதிகாரப்பூர்வ அறிவிப்பு வெளியாகலாம் என எதிர்பார்க்கப்படுகிறது.