கொரோனா தடுப்பூசி செலுத்திக்கொள்ள அரசியல்வாதிகள் முந்தக்கூடாது: பிரதமர் மோடி

கொரோனா தடுப்பூசி போட்டுக் கொள்ள அரசியல்வாதிகள் முந்தக்கூடாது, என பிரதமர் மோடி தெரிவித்துள்ளார். வரும் 16-ம் தேதி முதல் கட்டமாக சுகாதாரப் பணியாளர்கள், முன்களப் பணியாளர்கள் என மொத்தம் 3 கோடி பேருக்கு கொரோனா தடுப்பூசி போடப்பட உள்ளது.

அதன்பிறகு 50 வயதுக்கு மேற்பட்டவர்கள், 50 வயதுக்கு குறைவானவர்கள் என தடுப்பூசி போடப்படுகிறது. இவ்வாறு மொத்தம் 27 கோடி பேருக்கு தடுப்பூசி போட மத்திய அரசு திட்டமிட்டுள்ளது. இந்த நிலையில் இன்று பிரதமர் மோடி மத்திய உள்துறை அமைச்சர் அமித் ஷா ஆகியோர்தடுப்பூசி விநியோகம், பாதுகாப்பு உள்ளிட்ட அம்சங்கள் குறித்து இன்று ஆலோசனை கூட்டம் நடைபெற்றது.

இதில் பேசிய பிரதமர் மோடி கொரோனா நெருக்கடியில் ஒற்றுமையாக நாம் ஒன்றாக இணைந்து பணியாற்றினோம். விரைவான முடிவுகள் முழு உணர்திறனுடன் எடுக்கப்பட்டன. இதன் விளைவாக, கொரோனா உலக நாடுகளில் பரவியது போல் இந்தியாவில் பரவவில்லை.

நமது நாட்டில் தயாரிக்கப்பட்ட தடுப்பூசிகள் மற்றவர்களை விட செலவு குறைந்தவை. இவை நமது தேவைகளுக்கு ஏற்ப உருவாக்கப்பட்டுள்ளன. முதல் கட்டமாக சுமார் 3 கோடி சுகாதார ஊழியர்கள் மற்றும் முன்னணி தொழிலாளர்களுக்கு தடுப்பூசி போடப்படும்.

சுகாதார ஊழியர்கள், துப்புரவுத் தொழிலாளர்கள், பிற முன்னணி தொழிலாளர்கள், பாதுகாப்புப் படைகள், காவல்துறை மற்றும் பிற துணை ராணுவப் படையினருக்கும் முதல் கட்டத்தில் தடுப்பூசி போடப்படும். 3 கோடி கரோனா போர் வீரர்கள், முன்னணி தொழிலாளர்கள் முதல் கட்ட தடுப்பூசி போடுவதற்கான செலவுகளை மத்திய அரசு ஏற்கும்.

கொரோனா தடுப்பூசிக்கு அரசியல்வாதிகள் முந்தக்கூடாது. தங்களுக்கான முறை வரும்போது அரசியல்வாதிகள் தடுப்புசி போட்டுக்கொள்ள வேண்டும் என பிரதமர் மோடி கூறினார்.