சச்சின், அனில் அம்பானி உள்பட 380க்கும் மேற்பட்டோர் முறைகேடாக பல கோடி ரூபாய் வெளிநாட்டில் முதலீடு? புயலைக் கிளப்பும் Pandora!

உலகம் முழுவதும் உள்ள அரசியல் தலைவர்கள், சினிமா நட்சத்திரங்கள், விளையாட்டு வீரர்கள், தொழிலதிபர்கள் என பலர் வெளிநாடுகளில் முறைகேடுகளாகச் சொத்துக்களைப் பதுக்கி வைத்திருப்பதாக சர்வதேச புலனாய்வு பத்திரிக்கையாளர்கள் கூட்டமைப்பு (ICIJ) தகவலை வெளியிட்டுள்ளதால் பெரும் புயலைக் கிளப்பி இருக்கிறது.

பண்டடோரா பேப்பர்ஸ் என்ற பெயரில் வெளியாகி உள்ள இந்த புலனாய்வில் இந்தியாவைச் சேர்ந்த 380க்கும் மேற்பட்டவர்களின் பெயர்கள் இடம் பெற்றிருக்கிறது. இதில், கிரிக்கெட் வீரர் சச்சின் டெண்டுல்கர், தொழிலதிபர்கள் அனில் அம்பானி, நீரவ் மோடி உள்ளிட்டோரின் பெயர்களும், முன்னாள் நாடாளுமன்ற உறுப்பினர்களின் பெயர்களும் இடம் பெற்றிருக்கிறார்கள்.

மேலும் உலக தலைவர்களின் பெயர்களும் இதில் அடங்கியுள்ளது. குறிப்பாக ரஷ்ய அதிபர் விளாடிமிர் புடின், கென்யா ஜனாதிபதி உஹுரு, செக் குடியரசு பிரதமர் ஆண்ட்ரேஸ் பாபிஸ், ஜோர்டான் மன்னர் அப்துல்லா, பிரிட்டன் முன்னாள் பிரதமர் டோனி பிளேர் மற்றும் பாப் இசை பாடகி ஷகிரா, பாகிஸ்தான் பிரதமர் இம்ரான்கான் ஆகியோர் வரி ஏய்ப்பு மற்றும் நிதி முறைகேட்டில் ஈடுபட்டுள்ளதாகச் சுட்டிக்காட்டப்பட்டிருக்கிறது.

அதில் ஜோர்டான் மன்னர் அப்துல்லா அமெரிக்காவிலும் இங்கிலாந்திலும் 100 மில்லியன் டாலர் மதிப்புள்ள சொத்துக்களை ரகசியமாக குவித்து வைத்திருப்பதாக இந்த புலனாய்வில் தகவல் வெளியாகியுள்ளது.

வங்கிகளில் ஆயிரக்கணக்கான கோடி கடன்பட்டிருக்கும் இந்தியர்கள், தங்களின் சொத்துக்களைக் கணிசமான பகுதியைக் கடல் நிறுவனங்களில் முதலீடு செய்திருப்பதாக அந்த அறிக்கையில் சுட்டிக்காட்டப்பட்டுள்ளது.

இந்த புலனாய்வில் 117 நாடுகளிலிருந்தது 150க்கும் மேற்பட்ட பத்திரிகையாளர்கள் ஈடுபட்டிருக்கிறார்கள். இவர்கள் சேகரித்த தகவல்களைத் தான் தற்போது `பண்டோரா பேப்பர்ஸ்' என்ற பெயரில் வெளியாகி உள்ளது.

மேலும், 2016ம் ஆண்டு பனாமா பேப்பர் என்ற பெயரில் பலரின் முறைகேடுகள் குறித்து தகவல்கள் வெளியாக பெரும் பரபரப்பை ஏற்படுத்தி இருந்தது. இதனையடுத்து, தற்போது `பண்டோரா பேப்பர்ஸ்' வெளிவந்துள்ள தகவல்கள் பெரும் புயலைக் கிளப்பியுள்ளது.