‛விபத்துக்கு காரணம் மோசமான வானிலையா?’ - அதிகாரிகள் கூறுவது என்ன?

பனிமூட்டமும் மோசமான வானிலையும் குன்னூர் ஹெலிகாப்டர் விபத்துக்கு காரணமாக இருக்க முடியும் என்று கோவை விமான போக்குவரத்து கட்டுப்பாடு அதிகாரிகள் தகவல் தெரிவித்துள்ளனர்.

இந்திய முப்படை தலைமை தளபதி ஹெலிகாப்டர் விபத்தில் மரணம் அடைந்தார். இதற்கான காரணம் என்னவென்று தெரியவில்லை. இது தொடர்பான விசாரணை நடைபெற்று வருகிறது.

இது குறித்து, கோவை விமான போக்குவரத்து கட்டுப்பாடு அதிகாரிகளிடம் செய்தியாளர்கள் கேட்டபோது, அவர்கள் கூறியதாவது -

பனிமூட்டமும், மோசமான வானிலையும் குன்னூர் ஹெலிகாப்டர் விபத்துக்கு காரணமாக இருக்க முடியும். ஹெலிகாப்டரில் தொழில்நுட்ப கோளாறு காரணமாக இருக்க வாய்ப்பு இல்லை.

விஐபி பயணிகளுடன் செல்ல திட்டமிடப்பட்டிருந்ததால் அந்த விமானத்தில் தொழில்நுட்பக் கோளாறுகள் ஏற்பட வாய்ப்புகள் குறைவு என்று கூறினர். இந்த ஹெலிகாப்டர் மோசமான வானிலையிலும் பறக்கும் திறன் கொண்டது. ஆனால் நிலப்பரப்பு மலைப்பாங்கானது. ஹெலிகாப்டர் குறைந்த உயரத்தில் இருந்தே விழுந்ததாகத் தெரிகிறது.

இவ்வாறு அவர்கள் தெரிவித்தனர்.

இது குறித்து வானிலை ஆய்வு மைய இயக்குநர் புவியரசன் கூறியதாவது -

மலைப்பிரதேசங்களில் லேசானது முதல் மிதமான மழை பெய்யும் என்று நாங்கள் கணித்திருந்தோம். சமவெளிகளுக்கு மட்டுமே மூடுபனி இருக்கும். பள்ளத்தாக்குகள் மற்றும் மலைப்பாங்கான நிலப்பரப்புகளுக்கு மூடுபனியை முன்பே கணிப்பது கடினம்.

ஏனெனில் செயற்கைக்கோள் மற்றும் ரேடார் இரண்டும் அதைப் பிடிக்க முடியாது. மூடுபனியைப் பார்ப்பதன் மூலம் மட்டுமே கணிக்க முடியும். அப்போதும் கூட மூடுபனியையும் மேகங்களையும் வேறுபடுத்துவது கடினம்.

குன்னூரில் காலை 11.30 மணியளவில் மூடுபனி அல்லது குறைந்த மேகங்கள் காரணமாக பார்வைத்திறன் கணிசமாகக் குறைந்திருக்கலாம். குன்னூரில் புதன்கிழமை காலை 8.30 மணி வரை 4 மிமீ மழையும், பகலில் அதிகபட்ச வெப்பநிலை 19 டிகிரி செல்சியஸாகவும் பதிவாகியுள்ளது.

இவ்வாறு அவர் தெரிவித்தார்.