சஞ்சு சாம்சன் உலகத்தரம் வாய்ந்த வீரர்: அவருடையது சாதாரண கிரிக்கெட் ஷாட்கள் - கவுதம் காம்பீர்

இந்திய கிரிக்கெட் அணியின் பயிற்சியாளர் கவுதம் காம்பீர், மேற்கிந்திய தீவுகளுக்கு எதிரான போட்டியில் வெற்றி பெற வைத்த சஞ்சு சாம்சனை வெகுவாக பாராட்டினார்.

சஞ்சு சாம்சன்

2026 டி20 உலகக்கிண்ணத் தொடரின் அரையிறுதியில் நுழையப்போவது யார் என்ற போட்டியில், இந்தியா மற்றும் மேற்கிந்திய தீவுகள் ஈடன் கார்டன் மைதானத்தில் நேற்று மோதின. 

முதலில் ஆடிய மேற்கிந்திய தீவுகள் 195 ஓட்டங்கள் குவிக்க, பின்னர் இந்திய அணி 19.2 ஓவர்களில் 199 ஓட்டங்கள் எடுத்து வெற்றி பெற்றது.

இப்போட்டியில் இந்திய வீரர் சஞ்சு சாம்சன் (Sanju Samson) தொடக்க வீரராக களமிறங்கி நிதானமாக ஆடினார்.

எந்த ஓவரிலும் அவசரப்படாமல் ஷாட்களை தேர்வு செய்து ஆடிய அவர், கடைசி வரை ஆட்டமிழக்காமல் 50 பந்துகளில் 97 ஓட்டங்கள் விளாசினார். அவரது ஸ்கோரில் 4 சிக்ஸர், 12 பவுண்டரிகள் அடங்கும். 

பாராட்டிய காம்பீர்

போட்டிக்கு பின்னர் சஞ்சு சாம்சனை பயிற்சியாளர் கவுதம் காம்பீர் வெகுவாக பாராட்டினார். 

அவர், "சஞ்சு சாம்சன் ஒரு உலகத்தரம் வாய்ந்த வீரர், அவர் எவ்வளவு நல்ல வீரர் என்பது நம் அனைவருக்கும் தெரியும். அதுதான் நாம் அவரை ஆதரிக்க நோக்கமாகும்.

அணிக்கு அவர் மிகவும் தேவைப்பட்டபோது - இன்றுதான் (நேற்று) அந்த நாள் என்பது தெளிவாக தெரிந்தது - அவர் தனது முழுத் திறனையும் வெளிப்படுத்தினார்.

உண்மையில் அவர் ஒரு இன்னிங்ஸை ஒருபோதும் துரிதப்படுத்தியதில்லை என்று நான் உணர்ந்தேன். அது மிகவும் சாதாரண கிரிக்கெட் ஷாட்டுகள். அவர் பந்தை வலுவாக பயன்படுத்துவதில்லை; அதுதான் அவரது திறமை" என்றார்.