விடாமல் துரத்திய ரசிகர்கள்...நடிகர் ரஜினிகாந்த் ஓட்டம் - விமான நிலையத்தில் பரபரப்பு..!

சென்னை விமானம் நிலையம் வந்தடைந்த சூப்பர் ஸ்டார் நடிகர் ரஜினிகாந்துடன் ரசிகர்கள் செல்பி எடுக்க துரத்தியதால் ஒரு கட்டத்தில் அவர் வேகமாக காரில் ஏறி புறப்பட்டுச் சென்றார்.

நாளை பாடல் வெளியீட்டு விழா 

இயக்குநர் நெல்சன் திலீப்குமார் இயக்கத்தில் ரஜினிகாந்த் நடித்துள்ள படம் `ஜெயிலர்'. இந்தப் படத்தின் காவாலா, ஹூக்கும் பாடல்கள் வெளியாகி ரசிகர்களிடையே வரவேற்பை பெற்றுள்ள நிலையில், படத்தின் 3-வது சிங்கிள் வெளியிடப்பட்டுள்ளது.

ஜூஜூபி என்ற அந்த பாடல் இணையத்தில் வெளியாக சில மணி நேரத்தில் 24 லட்சம் பார்வையாளர்களை பெற்று சாதனை படைத்துள்ளது.

இந்தப் படத்திற்கு அனிருத் இசையமைத்துள்ளார். படத்தில் மோகன்லால், சிவராஜ்குமார், ரம்யாகிருஷ்ணன், தமன்னா, யோகிபாபு என ஒரு நட்சத்திர பட்டாளமே நடித்துள்ளது.

இப்படத்தின் பாடல் வெளியீட்டு விழா நாளை (ஜூலை 28ம் தேதி) சென்னை நேரு விளையாட்டு மைதானத்தில் நடைபெறுகிறது.

செல்பி எடுக்க ரசிகர்கள் ஆர்வம்

ஆகஸ்ட் 10-ம் தேதி படம் வெளியாக உள்ளது. இதனிடையே இலங்கை மற்றும் மாலத்தீவிற்கு ஆன்மிக சுற்றுலா சென்றிருந்த நடிகர் ரஜினிகாந்த் கொழும்புவில் இருந்து நேற்று மாலை விமானம் மூலம் சென்னை வந்தடைந்தார்.

சென்னை பன்னாட்டு விமான நிலையத்தின் புதிய முனையம் வழியாக வெளியே வந்த நடிகர் ரஜினிகாந்தை கண்டதும் விடாமல் துரத்திச் சென்ற ரசிகர்கள் செல்பி எடுத்துக் கொண்டனர். ஒரு வழியாக ரசிகர்களிடம் இருந்த தப்பித்த நடிகர் ரஜினிகாந்த் தன் காரில் ஏறி வீட்டிற்கு புறப்பட்டுச் சென்றார்.