இசைஞானி இளையராஜாவின் வாழ்க்கை வரலாறை அடிப்படையாக கொண்டு உருவாகும் படத்தில் தனுஷை நடிக்கவைப்பது தான் இளையராஜாவிற்கு தான் செய்யும் மரியாதை என இயக்குனர் பால்கி தெரிவித்துள்ளார்.  

இசைஞானி இளையராஜா

இசைஞானி இளையராஜா தமிழை தாண்டி இந்தியளவில் போற்றப்படும் மிகப்பெரிய ஆளுமையாக திகழ்ந்து வருகின்றார். கிட்டத்தட்ட 1400 படங்களுக்கு மேல் இசையமைத்துள்ள அவர், இன்றளவும் இசையுலகில் ஒப்பற்ற நட்சத்திரமாக விளங்கி வருகின்றார். அடுத்த தலைமுறை இசைக்கலைஞர்கள் வருகையால் சற்று படங்கள் குறைந்தாலும், தற்போதும் அவரின் மதிப்பு திரையுலகில் குறையவில்லை. அண்மையில் வெற்றிமாறன் இயக்கத்தில் விடுதலை படத்தில் இளையராஜாவின் பாடல்களும், பின்னணி இசையும் மிகுந்த வரவேற்பை பெற்றிருந்தது.

உருவாகும் Biopic 

அதிகப்படியாக biopic படங்களை தயாரித்து வரும் பாலிவுட்டின் கவனம் தற்போது இளையராஜா பக்கம் திரும்பியுள்ளது. பாலிவுட் பிரபல இயக்குனராக விளங்கும் பால்கி தற்போது இளையராஜா biopic'ஐ எடுக்கும் முனைப்பில் தீவிரமாக ஈடுபட்டு வருகின்றார். இது குறித்து பால்கி சமீபத்தில் அளித்த பேட்டியில் பேசிய தகவல் தற்போது மிகவும் வைரலாகி வருகிறது. அந்த பேட்டியில் பால்கி, இளையராஜாவின் வாழ்க்கை கதையை திரைப்படமாக எடுக்க வேண்டும் என்பது தன்னுடைய கனவு என குறிப்பிட்டு, அந்தப்படத்தில் தனுஷை நடிக்க வைப்பதுதான் இளையராஜாவிற்கு தான் கொடுக்கும் சிறந்த பரிசாக இருக்கும் என தெரிவித்துள்ளார்.  

தனுஷ் தான் சரியாக இருப்பார்

தனுஷ் தான் நடிக்கவேண்டும் ஏன் தான் கூறியதற்கு காரணமாக தன்னைப்போலவே தனுஷூம் இளையராஜாவின் தீவிரமான ரசிகர் என்றும் பால்கி விளக்கமளித்துள்ளார். இவரின் இந்த பேட்டி தற்போது மிகவும் வைரலாகி வருகின்றது. முன்னதாக பால்கி நடிகர் தனுஷுடன் ஷமிதாப் என்ற படத்தில் இணைத்து பணிபுரிந்துள்ளார் என்பது குறிப்பிடத்தக்கது. ஷமிதாப் படத்தில் தனுஷுடன் அமிதாப் பச்சன், அக்சரா ஹாசன் போன்றோர் நடித்திருந்தனர்.