கேரளாவில் பரவி வரும் டெங்கு, எலி காய்ச்சல் - ஒரே நாளில் 8 பேர் பலி!

கேரளா மாநிலத்தில் மிக தீவிரமாக பரவி வரும் எலி காய்ச்சலால் 8 பேர் பலியாகியுள்ளனர்.

காய்ச்சல்

கேரள மாநிலத்தில், தற்போது தென்மேற்கு பருவமழை தீவிரமடைந்து வரும் நிலையில் அங்கு பலவித காய்ச்சல் மிகவும் வேகமாக பரவி வருகிறது. இதில் மலப்புரம் மாவட்டத்தில் 2,007 பேர் காய்ச்சலால் பாதிக்கப்பட்டுள்ளனர்.

அதேபோல் கோழிக்கோடு மாவட்டத்தில் 1,488 பேரும், திருவனந்தபுரத்தில் 1,182 பேரும், பாலக்காட்டில் 1,042 பேரும், எர்ணாகுளத்தில் 1,030 பேரும் காய்ச்சல் பாதிப்புக்குள்ளாகி இருப்பதாக தகவல் வெளியாகி உள்ளது.

உயிரிழப்பு

இந்நிலையில், திருச்சூரில் எலி காய்ச்சலுக்கு 2 பெண்கள் பலியாகி உள்ளனர். மேலும், இந்த காய்ச்சலுக்கு மாநிலம் முழுவதும் இதுவரை 8 பேர் பலியாகி உள்ளனர். தற்போது கேரளாவில் டெங்கு காய்ச்சலும், எலி காய்ச்சலும் தீவிரமாக பரவி வருவதாக சுகாதாரத் துறை அதிகாரிகள் தெரிவித்துள்ளனர்.

தொடர்ந்து, அம்மாநில சுகாதாரத்துறை புள்ளி விபரங்களின் படி மாநிலத்தில் உள்ள அரசு ஆஸ்பத்திரிகளில் பல்வேறு வகை காய்ச்சல் பாதிப்புகளுக்கு 12 ஆயிரத்து 728 பேர் சிகிச்சை பெற்றுள்ளனர். இதனால் காய்ச்சல் பரவுவதை கட்டுப்படுத்தும் வகையில் நடவடிக்கைகளை தீவிரபடுத்து வருகின்றனர்.