தவெக பெண் வேட்பாளர் குறித்த உருவ கேலி; மு.க.ஸ்டாலினுக்கு முதல்வர் விஜய் கண்டனம்

cm vijay slams mk stalin for controversy speech about sathyabama: தவெக வேட்பாளர் சத்யபாமாவை உருவகேலி செய்யும் வகையில் பேசிய மு.க.ஸ்டாலினுக்கு முதல்வர் விஜய் கண்டனம் தெரிவித்துள்ளார்.

தவெக பெண் வேட்பாளர் குறித்த உருவ கேலி

தாராபுரத்தில், திமுக சார்பில் நடைபெற்ற பொதுக்கூட்டத்தில் திமுக வேட்பாளர் சுகன்யாவை ஆதரித்து அக்கட்சியின் தலைவர் மு.க.ஸ்டாலின் பிரச்சாரம் மேற்கொண்டார்.

இதில் பேசிய அவர், மக்களாகிய நீங்களே அவரை பெட்டி பாமா, பல்டி பாமா என அழைக்கிறீர்கள். இந்த உருவத்தை வைத்து அவர் எப்படி பல்டி அடித்தாரோ என தவெக வேட்பாளர் சத்யபாமாவை உருவகேலி செய்யும் வகையில் பேசினார்.

முகஸ்டாலினின் இந்த பேச்சு குறித்து தவெக சார்பில் தேர்தல் ஆணையத்தில் புகார் அளிக்கப்பட்டுள்ளது.

மேலும், மு.க.ஸ்டாலினின் இந்த பேச்சுக்கு தமிழ்நாடு முதல்வர் விஜய் கண்டனம் தெரிவித்துள்ளார்.

மு.க.ஸ்டாலினுக்கு முதல்வர் விஜய் கண்டனம்

இது குறித்து முதல்வர் விஜய் வெளியிட்டுள்ள அறிக்கையில், "தாராபுரம் தொகுதி இடைத்தேர்தல் பரப்புரைப் பொதுக்கூட்டம் என்ற பெயரில், தீய சக்தியான தி.மு.க. சார்பில் ஓர் அவதூறு மற்றும் அநாகரிகக் கூட்டத்தை நடத்தியுள்ளார், அதன் தலைவர் திரு. மு.க.ஸ்டாலின் அவர்கள்.

நமது தாராபுரம் தொகுதி வேட்பாளரான சகோதரி திருமதி சத்தியபாமா அவர்கள் குறித்து, உருவ கேலி செய்து, மிகவும் அநாகரிகமாகப் பேசிப் புளகாங்கிதம் அடைந்துள்ளார்.

தி.மு.க. சார்பாக வளர்க்கப்பட்டு வரும் ஆபாசநதியை, வன்மநதியை, வக்கிரநதியை உருவாக்கியதே திரு. முத்துவேல் கருணாநிதி ஸ்டாலின் ஆகிய தான்தான் என்பதைப் பெருமையுடன் மார்தட்டி மகிழ்வுடன் ஒப்புக்கொண்டிருக்கிறார். ஒப்புதல் வாக்குமூலம் கொடுத்திருக்கிறார்.

ஜனநாயகத்திற்கு விரோதமானவர்கள் தி.மு.க.வினர். ஆபாசமும் வன்மமும் வக்கிரமும் தி.மு.க.வின் மூலக்கூறிலும் மூளைக்கூறிலும் கலந்திருப்பதைத் தமிழக மக்கள் அனைவரும் காலகாலமாக உணர்ந்தே வைத்திருக்கின்றனர்.

பெண்களைப் பற்றி ஆபாசமாகப் பேசுவதில், அதிலும் பெண்களை அருகில் வைத்துக்கொண்டே, அவர்கள் அருவருப்பாக உணர்வதைக்கூட கண்டுகொள்ளாமல் பேசுவதில் வல்லவர்களான இந்தத் தீய சக்திக் கூட்டத்திற்குத் தமிழக மக்களும் தாராபுரம் தொகுதி மக்களும் தக்க பதிலடியைக் கொடுக்கத்தான் போகின்றனர்.

தொடர்ந்து பெண்களை ஆபாசமாகப் பேசி வரும் தீய சக்தி தி.மு.க.விற்குத் தமிழகப் பெண்களின் மகனாக, அண்ணனாக, தம்பியாக எனது வன்மையான கண்டனங்களைத் தெரிவித்துக்கொள்கிறேன்" என தெரிவித்துள்ளார்.