டெல்லியில் முதல்வர் ஸ்டாலின். மூன்று நாள் திட்டம் என்ன?

தமிழ்நாடு முதல்வராக பொறுப்பேற்ற பிறகு முதல் முறையாக மு.க.ஸ்டாலின் நாளை டெல்லி செல்கிறார். நாளை மாலை சென்னையில் இருந்து சிறப்பு விமானத்தில் டெல்லி செல்லும் முதல்வர் மு.க.ஸ்டாலினுக்கு அங்குள்ள தமிழ்நாடு இல்லத்தில் சிறப்பு வரவேற்பு அளிக்கப்படுகிறது.

முதல்வர் ஸ்டாலின் மூன்று நாள் டெல்லியில் தங்க உள்ள நிலையில் அவரது திட்டம் தொடர்பான விவரங்கள் வெளியாகியுள்ளன. நாளை மறுநாள் பிரதமர் இல்லத்தில் மோடியை, மு.க.ஸ்டாலின் சந்தித்து பேசுகிறார்.

இந்த சந்திப்பின் போது 35 முக்கிய கோரிக்கை பற்றி பிரதமருடன் முதல்வர் மு.க.ஸ்டாலின் பேச உள்ளார். இந்த சந்திப்பின் போது தலைமைச் செயலாளர் இறையன்பு உள்ளிட்ட மூத்த அதிகாரிகளும் உடன் இருப்பார்கள். மோடி- மு.க.ஸ்டாலின் இடையே நிர்வாக ரீதியாக நடைபெறும் இந்த சந்திப்பு சுமார் 1 மணிநேரமும் அதன் பிறகு பிரதமர் மோடியும் முதல்வர் மு.க.ஸ்டாலினும் தனியாக சந்தித்து பேசுகிறார்கள். இந்த சந்திப்பு 10 நிமிடங்கள் வரை நடைபெறும் என்றும் தகவல் வெளியாகி இருக்கிறது.

முதல்வர் மு.க.ஸ்டாலினின் டெல்லி சுற்றுப்பயணத்தை திமுக மூத்த தலைவரான டி.ஆர்.பாலு எம்.பி. மற்றும் அமைச்சர் துரைமுருகன் ஒருங்கிணைக்கின்றனர். தமிழ்நாடு அரசின் டெல்லி சிறப்பு பிரதிநிதியாக ஏ.கே.எஸ்.விஜயனும் உடன் இருப்பார்.

பிரதமருடனான சந்திப்புக்கு பிறகு மு.க.ஸ்டாலின் வருகிற 18-ந் தேதி குடியரசு தலைவர் ராம்நாத் கோவிந்த், குடியரசு துணை தலைவர் வெங்கையா நாயுடு ஆகியோரையும் சந்திக்க உள்ளார்.

உள்துறை அமைச்சர் அமித்ஷாவை சந்தித்து தமிழ்நாட்டின் கொரோனா தடுப்பூசி தட்டுப்பாடு தொடர்பாக மு.க.ஸ்டாலின் சந்தித்து பேசுகிறார். தமிழக டி.ஜி.பி. திரிபாதி விரைவில் ஓய்வுபெற உள்ளார். இதையடுத்து புதிய டி.ஜி.பி. நியமனம் தொடர்பாகவும் இருவரும் பேசுவதற்கு வாய்ப்புள்ளது.

அதன் பின்னர் பாதுகாப்புத்துறை அமைச்சராக உள்ள ராஜ்நாத் சிங்கையும் மு.க.ஸ்டாலின் சந்தித்து பேசுகிறார். அப்போது தமிழ்நாட்டில் ராணுவ தொழிற்சாலை அமைப்பது குறித்தும், இலங்கையில் அமைய உள்ள சீன துறைமுகத்தால் தமிழ்நாட்டிற்கு ஏற்பட உள்ள பாதுகாப்பு பிரச்சனைகள் குறித்தும் மு.க.ஸ்டாலின் விவரிப்பார் என்று தெரிகிறது.

பின்னர் ஒன்றிய அமைச்சர்கள் நிர்மலா சீதாராமனையும் மற்றும் பியூஷ் கோயலையும் மு.க.ஸ்டாலின் சந்தித்து தமிழகத்திற்கான திட்டங்கள் குறித்து பேச இருக்கிறார்.

அதன் காங்கிரஸ் தலைவர் சோனியா காந்தி மற்றும் காங்கிரஸ் எம்.பி ராகுல் காந்தி ஆகியோரையும் சந்தித்து பேச இருக்கிறார். மூன்று நாட்கள் சுற்றுப்பயணத்தை முடித்துக் கொண்டு 18-ந் தேதி மாலை அல்லது 19-ந் தேதி காலை மு.க.ஸ்டாலின் சென்னை திரும்புவார் என்று தெரிகிறது.