சந்திரயான் 3 நிலவில் தரையிறக்குவதில் சிக்கல்? சிறு மாற்றம் செய்யப்பட்டுள்ளது - ISRO அறிவிப்பு!

சந்திரயான் 3 தரையிறக்குவதில் சிறு மாற்றம் செய்யப்பட்டுள்ளதாக இஸ்ரோ அறிவித்துள்ளது.

சந்திரயான் 3

கடந்த ஜூலை 14ம் தேதி ஸ்ரீஹரிகோட்டாவில் இருந்து சந்திரயான் 3 விண்கலம் விண்ணில் ஏவப்பட்டது. அதைத் தொடர்ந்து பெங்களூரில் உள்ள இஸ்ரோவின் (ISRO) கட்டுப்பாட்டு மையத்திலிருந்து விண்கலத்தை இயக்கும் பணிகள் தற்போது மேற்கொள்ளப்பட்டு வருகிறது. தற்போது சந்திரயான் 3 மிஷன் நிலவை நோக்கி வெற்றிகரமாக சென்று கொண்டிருக்கிறது. நிலவின் புகைப்படங்களையும் இரண்டுமுறை சந்திரயான் 3 புகைப்படம் எடுத்து அனுப்பியிருந்தது.

பூமி சுற்றுவட்டப்பாதையை சுற்றி முடித்த பிறகு நிலவின் சுற்றுவட்டப்பாதைக்குள் விண்கலம் நுழைந்துள்ளது. இதைத் தொடர்ந்து ஆர்பிட்டரில் இருந்து விக்ரம் லேண்டர் தனியாக பிரிந்துள்ளது. படிப்படியாக நிலவுக்கும் விக்ரம் லேண்டருக்கும் இடையேயான தூரம் குறைக்கப்பட்டு வருகிறது. நேற்று நள்ளிரவில் சந்திரயான் 3 விண்கலத்தில் இறுதி வேகக்குறைப்பு செயல்பாடு நடைபெற்றது.

நேர மாற்றம்

தற்போது நிலவில் விக்ரம் லேண்டரை தரையிறக்குவதற்கான இறுதி கட்ட வேலைகளை இஸ்ரோ செயல்படுத்தி வருகிறது.  இந்நிலையில் நிலவில் சந்திரயான் 3 தரையிறக்கப்படும் நேரத்தில் சிறு மாற்றம் செய்யப்பட்டுள்ளதாக இஸ்ரோ தெரிவித்துள்ளது.

முன்னதாக ஆகஸ்ட் 23ம் தேதி மாலை 5.45 மணிக்கு தரையிறக்கப்படும் என இஸ்ரோ அறிவித்திருந்தது . தற்போது சந்திரயான் 3 ஆகஸ்ட் 23ம் தேதி மாலை 6.04 மணிக்கு தரையிறக்கப்படும் என்று இஸ்ரோ அறிவித்துள்ளது.