எங்கு சென்றாலும் பாஜக பெயர் ஒலிக்கிறது - நடிகை நமீதா பெருமிதம்

'கர்நாடகா தேர்தல் தோல்வி பிரச்சனை இல்லை, அடுத்த தேர்தலில் பார்த்துக்கொள்ளலாம்' என நடிகை நமிதா நம்பிக்கை தெரிவித்துள்ளார்.

அன்னையர் தின வாழ்த்துக்கள்

கோவை தெற்கு பாஜக சார்பில் ’பாஜக குடும்ப பிரிமியர் லீக்’ என்ற தலைப்பிலான கிரிக்கெட் விளையாட்டு போட்டி மதுக்கரை பகுதியில் நடைபெற்றது.

மாவட்டத் தலைவர் வசந்தராஜன் தலைமையில் நடைபெற்ற இந்த கிரிக்கெட் போட்டியை நடிகையும், பாஜக பிரமுகருமான நமிதா, கிரிக்கெட் விளையாடி போட்டியை தொடங்கி வைத்தார்.

பின்னர் செய்தியாளர்களிடம் அவர் பேசும்போது, “அனைவருக்கும் அன்னையர் தின வாழ்த்துக்கள். இன்று எனது முதல் அன்னையர் தினம்.

அதைவிட்டு இங்கே கிரிக்கெட் விளையாட்டுக்கு வந்துள்ளேன். இனிமேல்தான் சென்னை சென்று அன்னையர் தினத்தை கொண்டாட வேண்டும்” என்றார்.

எங்கு சென்றாலும் பாஜக பெயர் ஒலிக்கிறது

அதன் பின்னர் அரசியலுக்குத் தாவினார். “பாஜக மட்டும் தான் கட்சி உறுப்பினர்களை ஒருங்கிணைக்க இம்மாதிரியான நிகழ்ச்சிகளை நடத்தி வருகிறது.

மைசூர் சிங்கம் அண்ணாமலை பொறுப்பேற்றது முதல் பாஜக கட்சி நன்கு முன்னேறி வருகிறது. அதன் காரணமாக எங்கு சென்றாலும் பாஜக பெயர் ஒலிக்கிறது” என்று அண்ணாமலை புகழ் பாடினார்.

தொடர்ந்து கர்நாடகா தேர்தலில் பாஜக தோல்வி தொடர்பாக பதிலளித்த அவர், ”கர்நாடகத் தேர்தல் தோல்வி பெரிய பிரச்சனை இல்லை. அடுத்த முறை வெற்றி பெற்று விடலாம்.

மேலும் பாஜக தலைவர் அண்ணாமலை, பாரத பிரதமர் மோடி ஆகியோர் மீது அனைவருக்கும் நம்பிக்கை உள்ளது. எனவே இன்று வெற்றிபெறவில்லை என்றாலும், நாளை நிச்சயம் வெற்றி பெற்று விடலாம்” என நம்பிக்கை தெரிவித்தார்.