மக்களவை தேர்தல்: அமமுக வேட்பாளர்கள் அறிவிப்பு - டிடிவி தினகரன் எந்த தொகுதியில்?
பாஜக கூட்டணியில் அமமுக போட்டியிடும் 2 தொகுதிகளுக்கான வேட்பாளர்கள் பட்டியல் வெளியிடப்பட்டுள்ளது.
மக்களவை தேர்தல்
2024 மக்களவை தேர்தல் நாடு முழுவதும் ஏப்ரல் 19-ம் தேதி தொடங்கி 7 கட்டங்களாக நடைபெற உள்ளது. தமிழகம் மற்றும் புதுவையில் ஏப்ரல் 19-ம் தேதி ஒரே கட்டமாக தேர்தல் நடைபெறுகிறது.
இதற்கான வாக்கு எண்ணிக்கை ஜூன் 4-ம் தேதி நடைபெறவுள்ளது. இதனை முன்னிட்டு தேர்தல் நடத்தை விதிகள் அமலுக்கு வந்துள்ளது. மேலும், தேர்தல் தேதி அறிவிக்கப்பட்டதால் தமிழக தேர்தல் களம் அனல் பறக்க ஆரம்பித்துவிட்டது.
அமமுக வேட்பாளர்கள்
தமிழ்நாட்டில் திமுக கூட்டணி, அதிமுக. கூட்டணி, பாஜக கூட்டணி, நாம் தமிழர் என 4 முனைப்போட்டி ஏற்பட்டுள்ளது. இந்நிலையில் பாஜகவுடன் கூட்டணி அமைத்துள்ள அமமுக சார்பில், தேனி தொகுதியில் டிடிவி தினகரனும்,
திருச்சி தொகுதியில் செந்தில்நாதனும் போட்டியிடுவதாக அறிவிக்கப்பட்டுள்ளது. தேனி தொகுதியில் திமுக சார்பில் தங்க தமிழ்ச்செல்வனும் அதிமுக சார்பில் வி.டி நாராயணசாமியும் போட்டியிடுகிறார்கள் என்பது குறிப்பிடத்தக்கது.
