கழிவறை சென்ற மாணவியை கடித்த பாம்பு - கதறி துடித்த பரிதாபம்

குடியாத்தம் அரசு பள்ளியில் 7 ஆம் வகுப்பு படித்த மாணவி கழிவறைக்கு சென்ற நிலையில், அவரை பாம்பு கடித்த சம்பவம் அதிர்ச்சியை ஏற்படுத்தியுள்ளது.

மாணவியை கடித்த பாம்பு 

வேலுார் மாவட்டம் குடியாத்தம் அருகே உள்ள ஆலாம்பட்டரை கிராமத்தைச் சேர்ந்தவர் சிவஞானம். இவரது மகள் பூவிகா இவருக்கு வயது 13. ஒலக்காசி கிராமத்தில் இயங்கி வரும் அரசு உயர்நிலைப்பள்ளியில் 7-ஆம் வகுப்பு படித்து வருகிறார்.

வழக்கம் போல் மாணவி இன்று காலை பள்ளிக்கு சென்றுள்ளார். பின்னர் பள்ளி வளாகத்தில் உள்ள கழிவறைக்கு சென்றுள்ளார்.

அப்போது கழிவறை அருகே பதுங்கி இருந்த பாம்பு அருகே தெரியாமல் சென்று விட்டார்.அப்போது மாணவியை பாம்பு கடித்துள்ளது.

நலமாக உள்ளதாக மருத்துவர்கள் தகவல் 

இதனால் மாணவி பூவிகா அலறி கூச்சலிட்டார். பின்னர் அவரின் அலறல் சத்தம் கேட்டு ஓடி வந்த ஆசிரியர்கள் மற்றும் மாணவர்கள் அவரை மீட்டு குடியாத்தம் அரசு மருத்துவமனையில் அனுமதித்தனர்.

அங்கு மாணவிக்கு தீவிர சிகிச்சை அளிக்கப்பட்ட நிலையில் தற்போது மாணவி நலமாக இருப்பதாக மருத்துவர்கள் தெரிவித்துள்ளனர்.